អ្នកស្រី Sonia Cheng ត្រូវជាកូនស្រីរបស់លោក Henry Cheng ដែលជាមហាសេដ្ឋី និងម្ចាស់ក្រុមហ៊ុន New World Development កំពូលក្រុមហ៊ុនក្នុងវិស័យអចលនទ្រព្យ និងបដិសណ្ឋារកិច្ចប្រចាំហុងកុង។
Sonia Cheng កើតនៅឆ្នាំ ១៩៨០ បានបញ្ចប់ការសិក្សានៅសកលវិទ្យាល័យ Harvard ជាមួយនឹងមុខជំនាញ គណិតវិទ្យា និងសេដ្ឋកិច្ច។ មុនពេលចូលមកគ្រប់គ្រងអាជីវកម្មគ្រួសារ Sonia ទទួលបានបទពិសោធន៍ការងារនៅធនាគារ និងក្រុមហ៊ុនវិនិយោគដូចជា Morgan Stanley និង Warburg Pincus។ បទពិសោធន៍ផ្នែកហិរញ្ញវត្ថុ និងការវិនិយោគនេះហើយ ធ្វើឲ្យអ្នកស្រីមានចក្ខុវិស័យវែងឆ្ងាយ ក្នុងការដឹកនាំជំនួញគ្រួសារ។
នៅឆ្នាំ ២០១១ ក្នុងវ័យ ៣១ឆ្នាំ អ្នកស្រី Sonia Cheng បានឡើងកាន់តំណែងជានាយិកាប្រតិបត្តិ Rosewood Hotel Group បន្តពីឪពុក។ ជាបណ្តុំអាជីវកម្មដ៏ធំមួយប្រចាំហុងកុង មានប្រមាណជាង ៣០ សាខាកំពុងប្រតិបត្តិនៅ ២១ ប្រទេស។ លើសពីនេះលោកស្រី ក៏ជាអនុប្រធានប្រត្តិបត្តិនៃក្រុមហ៊ុន Chow Tai Fook Jewelry Group ដែលជាក្រុមហ៊ុនគ្រឿងអលង្ការចាស់វស្សាមួយនៅហុងកុង។
Sonia Cheng មិនត្រឹមតែជាអ្នកស្នងត្រកូល និងជំនួញរបស់គ្រួសារប៉ុណ្ណោះទេ ថែមទាំងជាមេដឹកនាំដ៏មានឥទ្ធិពល និងមានសមត្ថភាពមួយរូបផងដែរ។ ចាប់ពីឆ្នាំ ២០១១ ក្រោមការដឹកនាំរបស់អ្នកស្រី បានអភិវឌ្ឍន៍ Rosewood ក្លាយជាក្រុមហ៊ុនសណ្ឋាគារប្រណីតមួយក្នុងចំណោមក្រុមហ៊ុនជាច្រើននៅលើពិភពលោក។
តាមរយៈបទសម្ភាសន៍មួយអ្នកស្រីបានលើកឡើងថា នៅក្នុងវិស័យបដិសណ្ឋាកិច្ចនេះ ការរចនាបថ ការរៀបចំមានភាពប្រណិត ជាមួយនឹងយុទ្ធសាស្រ្តទីផ្សារល្អគឺរឿងសំខាន់មួយ។ ប៉ុន្តែបើមិនមានមនុស្សត្រឹមត្រូវនៅពីក្រោយនោះទេ ដូច្នេះអាជីវកម្មនេះមិនអាចរឹងមាំបានយូរឡើយ ការជ្រើសរើសមនុស្សមកធ្វើការជាមួយ ចាំសហការនៅពីក្រោយគឺសំខាន់ណាស់។ មានការសហការគ្នា ការចែករំលែកគំនិតគ្នា ទើបអាចជួយឲ្យអាជីវកម្មមួយដំណើរការបានយ៉ាងរលូន។