Indomie ជាម៉ាកយីហោមីគោកប្រចាំប្រទេសឥណ្ឌូនេសុី ត្រូវបានបង្កើតឡើងដោយក្រុមហ៊ុន IndoFood នៅក្នុងឆ្នាំ ១៩៧២ ដោយ Sudono Salim។
ដំណើរការផលិត Indomie ត្រូវបានកើតឡើង អំឡុងពេលដែលមីកញ្ចប់របស់ប្រទេសជប៉ុនទទួលបានជោគជ័យ និងរីកសាយភាយពេញពិភពលោក។ ល្បីទៅលើមីគោកមែន តែរសជាតិដំបូងគេដែលបានផលិតគឺ រសជាតិសាច់មាន់ ជាប្រភេទមីស៊ុប។ រហូតដល់ឆ្នាំ ១៩៨២ ប្រភេទមីគោក “Mi Goreng” បានចេញជាផ្លូវការ។
លក្ខណពិសេសរបស់មីគោកមួយនេះគឺ រសជាតិស្រដៀងនឹងមីឆាប្រចាំតំបន់ក្នុងប្រទេសឥណ្ឌូនេសុី ដែលមានការចូលរួមផលិតឡើងដោយអ្នកស្រី Nunuk Nuraini មានតួនាទីជាអ្នកបង្កើតរសជាតិ។ រសជាតិប្លែកខុសគេនេះ បានធ្វើឲ្យភាពល្បីល្បាញរបស់ “Mi Goreng” មិនត្រឹមតែល្បីនៅក្នុងស្រុកទេ ថែមទាំងល្បីដល់ក្រៅប្រទេសទៀត។
Indomie ក៏បាននាំចេញទៅប្រទេសជាច្រើននៅក្នុងតំបន់អាសុីអាគ្នេយ៍ បណ្តាប្រទេសមជ្ឈឹមបូព៌ា និងប៉ែកអាមេរិកខាងជើង។ មួយវិញទៀត ក្រុមហ៊ុន IndoFood ត្រូវបានចាត់ទុកជារោងចក្រផលិតមីកញ្ចប់ធំមួយប្រចាំឥណ្ឌូនេសុី ដែលអាចផលិតបាន ១៥ ពាន់លានកញ្ចប់សម្រាប់ផ្គត់ផ្គង់ក្នុងស្រុក និងនាំចេញ។
ភាពជោគជ័យរបស់ Indomie គឺបានជ្រោមជ្រែងយ៉ាងខ្លាំងដល់ IndoFood ឲ្យក្លាយជាក្រុមហ៊ុន និងរោងចក្រផ្គត់ផ្គង់ស្បៀងអាហារមួយប្រចាំប្រទេសឥណ្ឌូនេសុី។ រួមទាំងចែកចាយបានជាង ២០ ពាន់លានកញ្ចប់ក្នុងមួយឆ្នាំ ទៅកាន់ជាង ១០០ ប្រទេស ជាមួយនឹងរសជាតិថ្មីៗប្រមាណ ៥០ មុខ។
ចំណុចដែលយើងអាចរៀនពី IndoFood បាននោះគឺ បង្កើតនូវអ្វីដែលជាចំណុចពិសេសរបស់ផលិតផលខ្លួន រួចច្នៃឡើងបន្ថែមឲ្យត្រូវជាមួយតម្រូវការអតិថិជនបន្ថែមទៀត ទើបអាចជួយដល់អាជីវកម្មមានការប្រសើរឡើង។