ព្រោះតែម៉ាកយីហោស្បែកជើងមួយ ធ្វើឲ្យបុរសបីរូបនេះអាចរកចំណូលបានរាប់លានដុល្លារ

Crocs ជាម៉ាកស្បែកជើងពេញនិយមក្នុងពេលបច្ចុប្បន្ន ត្រូវបានបង្កើតឡើងដោយមិត្តភ័ក្តិ ៣ នាក់គឺ Scott Seamans, Lyndon Hanson និង​ George Boedecker នៅឆ្នាំ ២០០២។

ពាណិជ្ជកម្ម

ស្បែកជើងនេះត្រូវបានផលិតឡើង ក៏ព្រោះតែអ្នកទាំងបីចាប់អារម្មណ៍ទៅលើស្បែកជើងស្នោមួយប្រភេទ អំឡុងពេលជិះទូកកំសាន្តនៅ Caribbean។ ក្រោយមក ពួកគេក៏បានសហការជាមួយក្រុមហ៊ុន Foam Creations ដើម្បីផលិតស្បែកជើងមានរាងទូកនេះឡើង។ ចំណែកឈ្មោះ Crocs វិញគឺជាពាក្យកាត់របស់ Crocodile – សត្វក្រពើ ដែលជាសត្វអាចដើរលើគោក និងទឹកបាន ឲ្យសមនឹងគុណភាពស្បែកជើង។

នៅឆ្នាំ ២០០២ Crocs ក៏បានចេញស្បែកជើងដំបូងគេឈ្មោះ The Beach ពិសេសសម្រាប់ដាក់លក់នៅក្នុងកម្មវិធីពិព័រណ៍ទូកមួយនៅរដ្ឋ Florida។ ស្បែកជើងនេះត្រូវបានគេរិះគន់ខ្លាំងទៅលើរូបរាងអាក្រក់ មិនសមនឹងគួរឲ្យទិញ។ ប៉ុន្តែមិនបានប៉ុន្មានផង ២០០ គូរនេះក៏បានលក់អស់គ្មានសល់។

ម៉ាកយីហោនេះចាប់ផ្តើមមានសន្ទុះកាន់តែខ្លាំង​ នៅក្នុងឆ្នាំ ២០០៤ អាចលក់បានដល់ទៅ ៦៤៩,០០០ គូរ។ កាលនោះកេរ្តិ៍ឈ្មោះ Crocs ឡើងដល់ចំណុចកំពូលតែម្តង ដោយមនុស្សចាប់ផ្តើមងាកមកចូលចិត្តស្បែកជើងប្រភេទស្នោនេះវិញ ក៏ព្រោះតែទម្ងន់ស្រាល និងងាយស្រួលក្នុងការពាក់។

ត្រឹមរយៈពេល ៥ ឆ្នាំ នៅក្នុងឆ្នាំ ២០០៧ ស្បែកជើង Crocs ត្រូវបានចែកចាយដល់ទៅ ៩០ ប្រទេស លក់បានដល់ទៅ ១០០ លានគូរ។ ដើម្បីឆ្លើយតបនឹងតម្រូវការ ក្រុមហ៊ុនបានបង្កើនការផលិតដើម្បីស្តុកទុក ដែលចំនួនស្តុកនោះគឺឈានដល់ការប្រកាសអាសន្ន។ ប៉ុន្តែអ្វីៗមិនដូចការគិត នៅឆ្នាំ ២០០៨ វិបត្តិហិរញ្ញវត្ថុត្រូវបានកើតឡើង ស្តុកទាំងនោះត្រូវបានកប់ទុកចោល លក់មិនចេញ ដែលបណ្តាលឲ្យភាគហ៊ុន Crocs ធ្លាក់ចុះជាង ៩៥% នៅចុងឆ្នាំ ២០០៨។

បញ្ហាកើតមានជាបន្តបន្ទាប់អស់រយៈពេលជាច្រើនឆ្នាំ ទើបនៅឆ្នាំ ២០១៥ ក្រុមហ៊ុនក៏បានផ្លាស់ប្តូរលក់តាមប្រព័ន្ធអនឡាញ និងសហការជាមួយភ្នាក់ងារផ្សព្វផ្សាយរួមទាំងចូលរួមកម្មវិធីនានាជាច្រើន ដើម្បីសាងកេរ្តិ៍ឈ្មោះនៅក្នុងទីផ្សារម្តងទៀត។ មកដល់ឥឡូវ Crocs នៅតែជាស្បែកជើងដ៏ពេញនិយមមួយសម្រាប់មនុស្សគ្រប់វ័យ មានហាងចំនួនជាង ៣៩០ កន្លែងកំពុងដំណើរការទូទាំងពិភពលោក ជាមួយប្រាក់ចំណូលប្រមាណ $១.១៤៩ លានដុល្លារ គិតត្រឹមត្រីមាសទី២នៃឆ្នាំនេះ។