បន្ទាប់ពីការរង់ចាំជាច្រើនខែ ពេលនេះ ក្រុមហ៊ុន NVIDIA បានប្រកាសបង្ហាញចេញជាផ្លូវការនូវកញ្ចប់កុំព្យូទ័រ AI ខ្នាតតូច DGX Spark របស់ខ្លួនហើយ ដោយក្នុងនោះ គឺមានតម្លៃតែ ៣ ៩៩៩ដុល្លារប៉ុណ្ណោះ នៅក្នុងទីផ្សារសហរដ្ឋអាមេរិក។
បើនិយាយពីការរចនារបស់ DGX Spark នេះវិញ គឺមានទម្ងន់ត្រឹមតែ ១,១៨គីឡូក្រាមតែប៉ុណ្ណោះ ហើយវាគឺត្រូវបានបង្កើតឡើងជាពិសេសសម្រាប់ Developer ។
ជាមួយគ្នានេះ វាក៏ត្រូវបានបង្កើតឡើងដោយបច្ចេកវិទ្យា GB10 Grace Blackwell Superchip ដែលរួមបញ្ចូលនូវ 20-core Arm Grace CPU និង Blackwell GPU ដែលអាចដំណើរការបានដល់ ១ ០០០ពាន់ពាន់លានប្រតិបត្តិការក្នុងមួយវិនាទីផងដែរ។
គួរបញ្ជាក់ថា ក្រៅពីចំណុចខាងលើនេះ កញ្ចប់កុំព្យូទ័រខ្នាតតូច DGX Spark នេះ ក៏ទទួលបាននូវបច្ចេកវិទ្យា NVLink-C2C interconnect ដែលអាចបញ្ជូនទិន្នន័យលឿនជាង PCIe Gen 5 ដល់ទៅ ៥ដង រួមជាមួយនឹងអង្គចងចាំ 128GB LPDDR5x, អង្គផ្ទុក 4TB NVMe SSD ព្រមទាំងរន្ធ USB-C ចំនួន ៤ ក៏ដូចជា Wi-Fi 7 និងរន្ធ HDMI ផងដែរ៕