Telegram ជាកម្មវិធីផ្ញើសារធំជាងគេលំដាប់ទី ៤ ដែលមានអ្នកប្រើប្រាស់សកម្មចំនួនជាង ៩០០ លាននាក់ ត្រូវបានបង្កើតឡើងនៅឆ្នាំ ២០១៣ ដោយជនជាតិរុស្សីលោក Pavel Durov។
មុនពេលបង្កើត Telegram នេះឡើង លោក Pavel ជាស្ថាបនិកបណ្តាញសង្គមរុស្សីដ៏ធំមួយឈ្មោះ VKontakte ឬហៅកាត់ថា VK។ ប៉ុន្តែបញ្ហាជាច្រើនក៏បានកើតឡើង ទាក់ទងនឹងការរងសម្ពាធពីការបដិសេធមិនប្រគល់ទិន្នន័យអ្នកប្រើប្រាស់ទៅរដ្ឋាភិបាល។ ចុងក្រោយលោកក៏សម្រេចចិត្តលក់ភាគហ៊ុន ចាកចេញពីក្រុមហ៊ុន រួមទាំងចាកចេញពីប្រទេសផងដែរ។
បន្ទាប់មក លោក Pavel បានរួមគ្នាជាមួយលោក Nikolai Durov បង្កើត Telegram ឡើងប្រើប្រាស់ដើមទុនប្រមាណ ៣០០ លានដុល្លារដែលជាប្រាក់ទទួលបានពីការលក់ភាគហ៊ុន VK។ គោលដៅពួកគេ នៅតែបន្តនាំយកកម្មវិធីលឿនរហ័សសុវត្ថិភាពដដែល ដោយលោក Nikolai បានអភិវឌ្ឍន៍ឡើងនូវគ្រឹះបច្ចេកទេសសំខាន់មួយ MTProto សម្រាប់រក្សាសុវត្ថិភាពទិន្នន័យរបស់អ្នកប្រើប្រាស់។ នៅឆ្នាំ ២០១៤ មានមនុស្សប្រមាណ ៥០ លាននាក់កំពុងប្រើប្រាស់ Telegram ពីព្រោះតែសុវត្ថិភាព និងមានល្បឿនរហ័សក្នុងការផ្ញើជាសារ រូបភាព សំឡេង វីដេអូ និងឯកសារគ្រប់ប្រភេទជាមួយនឹងទំហំធំដល់ទៅ 1.5GB។
គួរចាប់អារម្មណ៍នោះ Telegram មិនមែនជាកម្មវិធីដែលបង្កើតឡើងដើម្បីរកប្រាក់ចំណេញនោះទេ ព្រោះមិនមានការផ្សាយពាណិជ្ជកម្មទូលំទូលាយ ឬលក់ទិន្នន័យដែលអាចឲ្យពួកគេរកចំណូលបានឡើយ។ ផ្ទុយទៅវិញ ចំណូលចម្បងរបស់ក្រុមហ៊ុននេះគឺបានមកពីកម្មវិធី Premium ដែលផ្តល់ជូននូវមុខងារពិសេសបន្ថែមសម្រាប់អ្នកប្រើប្រាស់ដែលបង់ប្រាក់។
សព្វថ្ងៃ ជាកម្មវិធីដែលមានអ្នកប្រើប្រាស់ជាង ៩០០ លាននាក់ទូទាំងពិភពលោក។ ប៉ុន្តែក៏មានប្រទេសខ្លះ បានដាក់ការហាមឃាត់មិនឲ្យកម្មវិធីនេះដំណើរការក្នុងប្រទេសខ្លួនផងដែរ។ ទោះបីជាយ៉ាងនេះក្តី Telegram នៅតែរក្សាឈ្មោះជាកម្មវិធីលំដាប់ទី ៤ នៅលើពិភពលោកបន្ទាប់ពីកម្មវិធី Messenger, Wechat និង Whatsapp។