មិនមែនក្នុងមួយថ្ងៃ តែគិតត្រឹមមួយម៉ោង រោងចក្រខ្មែរមួយនេះអាចផលិតបានម្រេចចំនួន ១តោនកន្លះ

ម្រេច ជាគ្រឿងផ្សំសំខាន់មួយសម្រាប់បង្កើនរសជាតិអាហារ។ បងប្អូនដឹងអត់ថា ម្រេចខ្មែរជាពិសេស ម្រេចកំពតមានការទទួលស្គាល់ពីសហភាពអឺរ៉ុបទៅលើរសជាតិ និងគុណភាពជាច្រើនឆ្នាំមកហើយ។

ពាណិជ្ជកម្ម

ក្នុងនោះដែរ ក៏មានក្រុមហ៊ុនផលិត និងកែច្នៃម្រេចក្នុងស្រុកមួយ Sela Pepper – សិលា ផិបភើ បង្កើតឡើងតាំងពីឆ្នាំ ២០១៥។ គោលដៅចម្បងរបស់ក្រុមហ៊ុនគឺនាំចេញម្រេចខ្មែរទៅកាន់ទីផ្សារអន្តរជាតិ ដែលសព្វថ្ងៃបាននាំចេញប្រមាណជាង ១០ ប្រទេសហើយ។

ជាក្រុមហ៊ុនក្នុងស្រុកដំបូងគេមួយ ដែលមានរោងចក្រផលិតម្រេចប្រកបដោយស្តង់ដារ ប្រើប្រាស់ជាមួយនឹងឧបករណ៍បច្ចេកវិទ្យាទំនើបៗជាច្រើន រួមទាំងមានបន្ទប់ពិសោធន៍ផ្ទាល់ខ្លួនក្នុងការធានានូវផលិតផលស្របតាមស្តង់ដារសុវត្ថិភាពចំណីអាហារ។

ទន្ទឹមនឹងនេះដែរ ក្រុមហ៊ុនផ្ទាល់ក៏បានសហការជាមួយពលរដ្ឋប្រមាណ ៨ សមាគមន៍ នៅក្នុង ៣ តំបន់ផ្សេងៗដូចជា ខេត្តត្បូងឃ្មុំ មណ្ឌលគិរី និងកំពត ដោយផ្តល់នូវការណែនាំ និងបច្ចេកទេសនៃការដាំដុះ ដើម្បីធានាកសិផលម្រេចដែលប្រមូលផលមកត្រូវតាមស្តង់ដារគុណភាព។

សម្រាប់ម្រេច Sela Pepper – សិលា ផិបភើ មានបីប្រភេទធំៗគឺ ម្រេចស ម្រេចខ្មៅ ម្រេចក្រហម ដែលបានយកកែច្នៃចេញជាប្រមាណ ៣០ ប្រភេទទៀតមានទាំងគ្រាប់ ម្សៅ និងប្រភេទម្រេចជ្រក់។

សព្វថ្ងៃកំពុងចែកចាយសឹងតែ ៩០% ហើយនៅតាមម៉ាត និងតាមផ្សារទំនើបនានានៅក្នុងប្រទេស។ ចំណែកទីផ្សារអន្តរជាតិវិញបាននាំចេញទៅ ប្រទេស​ជប៉ុន​ ចិន កូរ៉េ ប៉ូឡូញ។ល។ មិនតែប៉ុណ្ណោះ ក៏មានលក់នៅលើវេបសាយលក់ទំនិញរបស់ប្រទេសចិន Alibaba ផងដែរ។ ដោយឡែក ក្រុមហ៊ុននៅតែពង្រឹងស្តង់ដារគុណភាព ដើម្បីបន្តលើកកម្ពស់កេរ្តិ៍ឈ្មោះម្រេចខ្មែរទៅកាន់ទីផ្សារពិភពលោក។