ក្រុមហ៊ុន Dongfeng Nissan បានចាប់ផ្តើមផលិតម៉ាស៊ីន NR15 ដែលមានទំហំស៊ីឡាំង 1.5 លីត្រ បំពាក់ប្រព័ន្ធស្រូបខ្យល់ធម្មជាតិ (naturally aspirated) ដែលត្រូវបានរចនាឡើងពិសេសសម្រាប់ប្រើជាមួយប្រព័ន្ធ Plug-in Hybrid។ ម៉ាស៊ីននេះនឹងត្រូវប្រើនៅលើ Nissan N6 ដែលជារថយន្តសេដាន Plug-in Hybrid ដំបូងបង្អស់របស់ក្រុមហ៊ុន Nissan នៅប្រទេសចិន ហើយគេរំពឹងថានឹងចេញលក់នៅត្រីមាសទី 4 នៃឆ្នាំ 2025 តាមការរាយការណ៍របស់គេហទំព័រ Auto-home។
យោងតាមព័ត៌មានពីក្រសួងឧស្សាហកម្ម និងបច្ចេកវិទ្យាព័ត៌មាន (MIIT) របស់ចិន រថយន្ត N6 នឹងប្រើម៉ាស៊ីន NR15 ដែលមានកម្លាំង 75 kW (ប្រហែល 101 សេះ) រួមជាមួយម៉ូទ័រអគ្គិសនីមានកម្លាំង 155 kW (ប្រហែល 208 សេះ)។ ប្រព័ន្ធ Hybrid នេះភ្ជាប់ជាមួយថ្ម Lithium Iron Phosphate (LFP) មានសមត្ថភាព 21.1 kWh ផ្គត់ផ្គង់ដោយក្រុមហ៊ុន Rept Battero Energy Co., Ltd. ដែលអាចបើកដោយថាមពលអគ្គិសនីសុទ្ធបានចន្លោះពី 125 គម ដល់ 130 គម (តាមស្តង់ដារ WLTC) អាស្រ័យលើជម្រើសម៉ូដែល។
រថយន្ត N6 ត្រូវបានសង់លើគ្រឿងបន្លាស់ស្ថាបត្យកម្ម Tianyan Architecture របស់ Dongfeng Nissan ដោយមានប្រវែង 4,831 មម, ទទឹង 1,885 មម, កម្ពស់ប្រហែល 1,49x មម, និងគម្លាតកង់ 2,815 មម។ ទំហំទាំងនេះអនុញ្ញាតឲ្យមានកន្លែងគ្រប់គ្រាន់សម្រាប់ដំឡើងទាំងថ្ម និងម៉ាស៊ីន ឲ្យនៅរក្សាទុកចន្លោះខាងក្នុងដូចរថយន្តសេដានកម្រិតមធ្យម។
ក្នុងផ្នែករចនា N6 អនុវត្តន៍តាមលក្ខណៈរចនាថ្មីបំផុតរបស់ Nissan ផ្នែកខាងមុខមាន ប៉ាណាបិទជិត (closed grille) ជាមួយនឹងខ្សែពន្លឺ LED “star-ring” ដែលរត់ឆ្លងទៅមកលាតមុខរថយន្ត និងភ្ជាប់ជាមួយភ្លើងមុខទម្រង់ boomerang និង logo Nissan ភ្លឺ។ រថយន្តនេះប្រើ ដៃទ្វារលាក់ (hidden door handles) ខណៈខាងក្រោយមាន រចនាទម្រង់ ducktail និងភ្លើងក្រោយ LED តាមបណ្តោយផ្នែកគូទក្រោយ ដែលមានអក្សរ “NISSAN” ភ្លឺចែងចាំង។
ម៉ាស៊ីន NR15 ត្រូវបានកែច្នៃឲ្យផ្តោតលើប្រសិទ្ធភាព និងភាពធន់នឹងការប្រើប្រាស់ ដូចជាគោលការណ៍អភិវឌ្ឍន៍ប្រពៃណីរបស់ Nissan នៅពេលដំណើរការរួមជាមួយម៉ូទ័រអគ្គិសនី ប្រព័ន្ធ Hybrid នេះត្រូវបានរចនាឡើងឲ្យម៉ាស៊ីនដំណើរការនៅក្នុងជួរប្រើប្រាស់ដែលមានប្រសិទ្ធភាពខ្ពស់បំផុតនៅក្រោមលក្ខខណ្ឌភាគច្រើន។ រថយន្ត N6 នឹងចូលទីផ្សារបន្ទាប់ពីការចេញលក់រថយន្តអគ្គិសនីសុទ្ធ Nissan N7 កាលពីដើមឆ្នាំនេះ ដែលជារថយន្តសេដានអគ្គិសនីដំបូងរបស់ Nissan នៅចិន ដោយមានតម្លៃចាប់ពី 119,900 យ័ន (ប្រហែល 16,840 ដុល្លារអាមេរិក)។ ពីគោលដៅទីផ្សារ និងប្រព័ន្ធថាមពលរបស់វា គេរំពឹងថា N6 នឹងមានតម្លៃទាបជាង N7 ហើយអាចនឹងត្រូវនាំចេញជាផ្នែកនៃកម្មវិធីនាំចេញរបស់ Dongfeng Nissan តាមរយៈក្រុមហ៊ុនរួម NCIC។
