ក្រុមហ៊ុនបច្ចេកវិទ្យាទូរគមនាគមន៍យក្សរបស់ចិន Huawei Technologies បានប្រកាសចេញនូវបច្ចេកវិទ្យា បើកបរស្វ័យប្រវត្តិវៃឆ្លាតលើរថយន្ត Huawei HI Intelligent របស់ខ្លួន កាលពីថ្ងៃអាទិត្យកន្លងទៅនេះ។
ប្រព័ន្ធនេះមានគួបផ្សំរវាង ប្រព័ន្ធកុំព្យូទ័រ, ប្រព័ន្ធរ៉ាដារូបភាព 4D, ប្រព័ន្ធបើកបរស្វ័យប្រវត្តិ និងការគ្រប់គ្រងកម្ដៅឆ្លាតវៃ។ វាដំណើរការលើប្រព័ន្ធ Harmony OS និងបន្ទះឈីប LiDar របស់ក្រុមហ៊ុន Huawei និងគាំទ្រប្រព័ន្ធ 5G ទៀតផង។
លោក Wang Jun ប្រធានផ្នែក Intelligent Automotive Solutions Business Unit របស់ក្រុមហ៊ុន Huawei បានមានប្រសាសន៍ថា “បដិវត្តនៅក្នុងរថយន្តឆ្លាតវៃកំពុងតែឈានចូលមកដល់ ហើយក្រុមហ៊ុន Huawei នឹងធ្វើការច្នៃប្រឌិតបច្ចេកវិទ្យាជានិច្ច ដើម្បីបំភ្លឺទស្សនវិស័យសម្រាប់វិស័យនេះ”។
គួរឲ្យដឹងដែរថា ការដាក់បង្ហាញនេះបានកើតឡើង ស្របពេលដែលក្រុមហ៊ុន Huawei កំពុងឈានមុខគេលើផ្នែករថយន្តឆ្លាតវៃ។ ក្រុមហ៊ុនគ្រោងនឹងវិនិយោគ ១ ពាន់លានដុល្លារជារៀងរាល់ឆ្នាំ ក្នុងការស្រាវជ្រាវ និងអភិវឌ្ឍន៍ ខណៈវាកំពុងតែស្វែងរកប្រភពចំណូលថ្មី ចំពេលមានការដាក់ទណ្ឌកម្មរបស់សហរដ្ឋអាមេរិក លើឧបករណ៍ networking និងអាជីវកម្មស្មាតហ្វូន៕