យោងតាមប្រភពព័ត៌មានបានឲ្យដឹងថា ក្រុមហ៊ុន Microsoft Corporation នឹងវិនិយោគទឹកប្រាក់ចំនួន ១ ពាន់លានដុល្លារ ក្នុងរយៈពេល ៥ ឆ្នាំខាងមុខ នៅក្នុងប្រទេសម៉ាឡេស៊ី ដែលជាផ្នែកមួយនៃកម្មវិធីភាពជាដៃគូថ្មីជាមួយទីភ្នាក់ងាររដ្ឋាភិបាល និងក្រុមហ៊ុនក្នុងស្រុក។
សេចក្តីប្រកាសស្តីពីការវិនិយោគធំបំផុត របស់ក្រុមហ៊ុនបច្ចេកវិទ្យាយក្សអាមេរិកខាងលើ នៅម៉ាឡេស៊ីនេះ ធ្វើឡើងបន្ទាប់ពីប្រទេសនេះបានផ្តល់ការយល់ព្រមតាមល័ក្ខខ័ណ្ឌ សម្រាប់ក្រុមហ៊ុន Microsoft, Google, Amazon និងក្រុមហ៊ុនទូរគមនាគមន៍ Telekom Malaysia ដើម្បីសាងសង់ និងគ្រប់គ្រង មជ្ឈមណ្ឌលទិន្នន័យ (data centre) ខ្នាតធំ និងផ្តល់សេវាកម្ម Cloud។
គួរឲ្យដឹងដែរថា ការវិនិយោគនេះបានកើតឡើង បន្ទាប់ពីប្រទេសម៉ាឡេស៊ីបានមើលឃើញការវិនិយោគផ្ទាល់ពីបរទេស (FDI) ធ្លាក់ចុះ ៦៨% កាលពីឆ្នាំមុន ដែលជាការធ្លាក់ចុះដ៏ធំបំផុតនៅអាស៊ីអាគ្នេយ៍។
ប្រទេសម៉ាឡេស៊ីបានចាត់ទុកខ្លួនជាទិសដៅវិនិយោគមួយ ដោយរដ្ឋមន្រ្តីក្រសួងហិរញ្ញវត្ថុថ្មីៗនេះ បាននិយាយថា ខ្លួនកំពុងសម្លឹងមើលការលើកទឹកចិត្ត ដើម្បីជួយទាក់ទាញការវិនិយោគផ្ទាល់ពីបរទេសបន្ថែមទៀត៕