Dat Bike ដែលជាក្រុមហ៊ុនម៉ូតូអគ្គិសនី Start-up របស់ប្រទេសវៀតណាម បានប្រមូលថវិកាចំនួន ២,៦ លានដុល្លារពីការវិនិយោគរបស់ក្រុមវិនិយោគិន ដែលដឹកនាំដោយក្រុមហ៊ុនបណ្តាក់ទុនក្នុងប្រទេសសិង្ហបុរី ឈ្មោះ Jungle Ventures។
ជាមួយគ្នានេះ ក្រុមហ៊ុនមូលធនបណ្តាក់ទុនសហរដ្ឋអាមេរិក Wavemaker Partners, Hustle Fund និង iSeed Ventures ក៏មាននៅក្នុងនោះដែរ។
ក្រុមហ៊ុន Start-up ខាងលើ គ្រោងនឹងបង្កើតបណ្តាញផ្គត់ផ្គង់នៅអាស៊ីអាគ្នេយ៍ ក្នុងរយៈពេល ២ ទៅ ៣ ឆ្នាំខាងមុខ។
លោក Amit Anand ដៃគូស្ថាបនិករបស់ក្រុមហ៊ុន Jungle Ventures បានមានប្រសាសន៍ថា “យើងជឿជាក់ថា Dat Bike នឹងដឹកនាំវិស័យយានចល័ត និងបង្កើតគោលដៅថ្មី មិនត្រឹមតែនៅក្នុងតំបន់ប៉ុណ្ណោះទេ ប៉ុន្តែវាមានសក្តានុពលជាសកល សម្រាប់អ្វីដែលម៉ូតូអគ្គិសនីជំនាន់ក្រោយនឹងមើល និងអនុវត្ត”។
ស្ថាបនិកក្រុមហ៊ុន Dat Bike លោក Nguyen Ba Canh Son បាននិយាយថា ថវិកានេះនឹងជួយពង្រីកសមត្ថភាពផលិតកម្ម និងផ្តល់មូលនិធិសម្រាប់ការស្រាវជ្រាវ និងអភិវឌ្ឍន៍។ លោក Son បានបង្កើត Dat Bike នៅខែធ្នូ ឆ្នាំ២០១៨ បន្ទាប់ពីឈប់ពីការងារនៅ Silicon Valley សហរដ្ឋអាមេរិក។
ម៉ូតូអគ្គិសនីដំបូងគេរបស់ Dat Bike គឺម៉ូដែល Weaver ដែលមានបំពាក់ម៉ូទ័រកម្លាំង ៥ ០០០វ៉ាត់ ហើយមានល្បឿន ៨០ គីឡូម៉ែត្រក្នុងមួយម៉ោង។ អាគុយរបស់វាអាចសាកពេញ ក្នុងរយៈពេល ៣ម៉ោង។ វាមានតម្លៃ ៣៩,៩ លានដុង ឬប្រហែល ១ ៧៣៥ ដុល្លារ៕