បន្ទាប់ពីមានការវិនិយោគនូវទឹកប្រាក់់ចំនួន ១០០ ពាន់លានដុល្លារ ជាមួយនឹងក្រុមហ៊ុន NVIDIA ពេលនេះ ក្រុមហ៊ុន OpenAI ដែលជាក្រុមហ៊ុន AI ធំជាងគេរបស់សហរដ្ឋអាមេរិក ក៏បានប្រកាសចុះនូវកិច្ចព្រមព្រៀងផ្គត់ផ្គង់ និងភាពជាដៃគូយុទ្ធសាស្ត្រថ្មីជាមួយនឹងក្រុមហ៊ុន AMD ផងដែរ ដោយការសហការគ្នានេះ គឺដើម្បីបង្កើតនូវហេដ្ឋារចនាសម្ព័ន្ធ AI ជំនាន់ថ្មី ដោយប្រើប្រាស់នូវ GPU របស់ AMD រាប់សិបលានគ្រឿងឯណ្ណោះ។
ពាណិជ្ជកម្ម
ក្នុងនោះ សម្រាប់ការសហការគ្នារបស់ក្រុមហ៊ុន AMD ជាមួយក្រុមហ៊ុន OpenAI នេះ ក៏មានគោលបំណងជួយដល់ការអភិវឌ្ឍន៍ម៉ូដែល AI ជំនាន់បន្ទាប់របស់ក្រុមហ៊ុន OpenAI ផងដែរ ខណៈដំណាក់កាលដំបូងនៃការសហការនេះ ក្រុមហ៊ុន AMD ផ្ទាល់នឹងផ្គត់ផ្គង់នូវ GPU ជំនាន់ថ្មី AMD Instinct MI450 របស់ខ្លួនចំនួន ១ ជីហ្គាវ៉ាត់ ដល់់ក្រុមហ៊ុន OpenAI នៅពាក់កណ្តាលឆ្នាំ ២០២៦ ខាងមុខនេះ។ ខណៈការផ្គត់ផ្គង់សរុបវិញ គឺមានចំនួនដល់ទៅ ៦ ជីហ្គាវ៉ាត់ឯណ្ណោះ។
ជាមួយគ្នានេះ ជាផ្នែកមួយនៃកិច្ចព្រមព្រៀងនេះ ក្រុមហ៊ុន AMD ក៏បានផ្តល់សិទ្ធិឲ្យក្រុមហ៊ុន OpenAI អាចទទួលបាននូវភាគហ៊ុនរបស់ខ្លួនប្រមាណ ១៦០លានហ៊ុនផងដែរ ប្រសិនបើពួកគេសម្រេចបាននូវគោលដៅដែលកំណត់តាមកិច្ចព្រមព្រៀងខាងលើ ខណៈការផ្តល់ភាគហ៊ុននេះវិញ នឹងធ្វើឡើងតាមដំណាក់កាលនៃការផ្គត់ផ្គង់ GPU ៕