Luckin Coffee ជាហាងកាហ្វេពេញនិយមមួយនៅប្រទេសចិន ត្រូវបានបង្កើតឡើងក្នុងឆ្នាំ ២០១៧ ដោយ Jenny Qian និងក្រុមវិនិយោគប៉ុន្មាននាក់ទៀត។ ជាហាងដែលមានសមត្ថភាពអាចពង្រីកសាខាដល់ទៅ ៤៥០០ កន្លែងមានអតិថិជនគាំទ្រជាង ៤០ លាននាក់ ក្នុងរយៈពេលត្រឹមតែ ២ឆ្នាំ វ៉ាដាច់ Starbucks នៅចិនតែម្តង។
ចំណុចពិសេសខុសគេមួយពីហាងកាហ្វេនេះនៅត្រង់ថា ការកុម្ម៉ង់ទាំងប៉ុន្មានត្រូវបញ្ជាទិញតាមអនឡាញ ជាមួយនឹង App របស់ពួកគេ។ ជាវិធីសាស្រ្តល្អមួយ ដែលអាចជួយកាត់បន្ថយពេលវេលារង់ចាំរបស់អតិថិជន លក់បានច្រើនក្នុងពេលតែមួយ រួមទាំងអាចឲ្យពួកគេស្រង់ទិន្នន័យពីការលក់ និងចំណូលចិត្តរបស់អតិថិជនបានថែមទៀត។ ព្រោះក្នុងសម័យឌីជីថលនេះទិន្នន័យគឺសំខាន់សម្រាប់យកមកវិភាគ និងដំណើរការអាជីវកម្ម។
មិនត្រឹមតែប៉ុណ្ណោះ Luckin Coffee បង្កើនកេរ្តិ៍ឈ្មោះម៉ាកយីហោខ្លួន តាមរយៈការសហការជាមួយនឹងប្រេនល្បីៗជាច្រើនទាំងក្នុង និងក្រៅស្រុក។ ជាក់ស្តែង បានសហការជាមួយនឹង Moutai ដែលជាស្រាសល្បីមួយនៅប្រទេសចិន ក្នុងការបង្កើតរសជាតិថ្មីគឺ កាហ្វេស្រាស។ មានការចែកចាយពេញបណ្តាញសង្គម ដោយគ្រាន់ចេញលក់ថ្ងៃដំបូងសោះ លក់បានដល់ទៅ ៥.៤២ លានកែវ។ ក្រៅពីនេះ ក៏មាននូវភេសជ្ជៈថ្មីប្លែកជាបន្តបន្ទាប់ ធ្វើឲ្យម៉ាកយីហោមួយនេះកាន់តែមានភាពល្បីល្បាញទ្វេដង។
Luckin Coffee ឈានចូលទីផ្សារក្រោយគេមែន តែបើយុទ្ធសាស្រ្តទីផ្សារវិញគឺខ្លាំង។ ដោយពួកគេសិក្សាពីអតិថិជនគោលដៅ សង្កេតមើលភាពខ្វះខាតនៃហាងកាហ្វេ រួចបង្កើតដំណោះស្រាយថ្មី ដាក់ឲ្យចំគោលដៅពួកគេចង់បាន។ គិតមកត្រឹមឆ្នាំ ២០២៥ នេះវិញ Luckin Coffee បង្កើតបានដល់ទៅច្រើនជាង ២៦,០០០ កន្លែងក្នុងប្រទេសចិន និងបានបន្តនាំចេញទៅប្រទេសសិង្ហបុរី, ម៉ាឡេសុី, ហុងកុង សហរដ្ឋអាមេរិក, និងប្រទេសផ្សេងៗទៀត។