ក្រុមហ៊ុនផលិតរថយន្តអគ្គិសនី និងថ្ម BYD របស់ចិន បានបង្កើនមូលធនចុះបញ្ជីពីប្រហែល ៣.០៣៩ ពាន់លានយ័ន (៤២៦ លានដុល្លារ) តែថ្មីៗនេះបានផ្លាស់ប្តូរទៅជា ៩.១១៧ ពាន់លានយ័ន (១.២៨ ពាន់លានដុល្លារ) ដែលកំណត់បានកើនឡើងដល់ ២០០% ដោយផ្អែកលើទិន្នន័យចុះបញ្ជីក្រុមហ៊ុន តាមរបាយការណ៍របស់ IT-Home។
ក្នុងប្រព័ន្ធសហគ្រាសនៅចិន មូលធនចុះបញ្ជី មានន័យថា ចំនួនទឹកប្រាក់ដែលភាគហ៊ុនកាន់ត្រៀមចូលវិនិយោគទៅក្នុងក្រុមហ៊ុន ការកើនឡើងនៃមូលធនចុះបញ្ជីអាចប៉ះពាល់លើកេរ្តិ៍ឈ្មោះជាមួយអ្នកផ្គត់ផ្គង់ ដៃគូ និងស្ថាប័នហិរញ្ញវត្ថុ។ នេះជាលើកទីពីរ ដែល BYD បង្កើនមូលធនចុះបញ្ជីក្នុងឆ្នាំ ២០២៥។ នៅខែឧសភា ២០២៥ កន្លងមក ក្រុមហ៊ុនបានបង្កើនពី ២.៩០៩ ពាន់លានយ័ន (៤០៧ លានដុល្លារ) ទៅ ៣.០៣៩ ពាន់លានយ័ន (៤២៦ លានដុល្លារ)។
BYD ត្រូវបានបង្កើតឡើងនៅខែកុម្ភៈ ឆ្នាំ ១៩៩៥ ដោយមានលោក Wang Chuanfu ជាតំណាងផ្នែកច្បាប់។ ក្រុមហ៊ុនដំណើរការតាមវិស័យជាច្រើន រួមមាន៖ ការផលិត និងលក់ថ្មលីចូមអ៊ីយ៉ុង និងថ្មប្រភេទផ្សេងៗ ការផលិតឧបករណ៍សាក ការផលិតផលិតផលអេឡិចត្រូនិក និងគ្រឿងបន្លាស់។ ព្រមទាំងធ្វើជាអ្នកចែកចាយសំខាន់នៃរថយន្ត BYD សម្រាប់ក្រុមហ៊ុន BYD Auto Co., Ltd. (គ្រប់គ្រងទីផ្សារ ការលក់ដុំ ការនាំចេញ និងសេវាក្រោយការលក់)។ ភាគហ៊ុនកាន់រួមមាន៖ Hong Kong Securities Clearing (Nominees) Limited, Wang Chuanfu, Lu Xiangyang និង Rongjie Investment Holding Group Co., Ltd.
តាមរបាយការណ៍ហិរញ្ញវត្ថុ BYD ក្នុងពាក់កណ្តាលដំបូងឆ្នាំ ២០២៥ ក្រុមហ៊ុនបានរកប្រាក់ចំណេញសុទ្ធ ១៥.៥១១ ពាន់លានយ័ន (២.១៧ ពាន់លានដុល្លារ) និងចំណូលប្រតិបត្តិការ ៣៧១.២៨១ ពាន់លានយ័ន (៥២ ពាន់លានដុល្លារ)។ ការវិនិយោគស្រាវជ្រាវ និងអភិវឌ្ឍ (R&D) សរុប ៣០.៩ ពាន់លានយ័ន (៤.៣៣ ពាន់លានដុល្លារ) ខណៈចំណូលពីទីផ្សារបរទេសឈានដល់ ១៣៥.៣៥៨ ពាន់លានយ័ន (១៩ ពាន់លានដុល្លារ) ដែលគិតជាភាគរយដល់ទៅ ៣៦.៥% នៃចំនួនលក់សរុប។
ចាប់ពីខែមករា ដល់សីហា ឆ្នាំ ២០២៥ BYD បានកត់ត្រាការលក់បានរថយន្ត ២.៨៦៤ លានគ្រឿង ដែលកើនឡើង ២៣% បើប្រៀបធៀបនឹងឆ្នាំ ២០២៤។ ក្រុមហ៊ុនបានកំណត់គោលដៅលក់ប្រចាំឆ្នាំ ៥.៥ លានគ្រឿង សម្រាប់ឆ្នាំ ២០២៥។ ដើម្បីឈានដល់គោលដៅនេះ BYD ត្រូវតែមានការលក់ជាមធ្យម ៦៦០,០០០ គ្រឿងក្នុងមួយខែ ចាប់ពីខែកញ្ញា ដល់ធ្នូ។
រហូតមកដល់ពេលនេះ BYD មិនទាន់បានចេញសេចក្តីថ្លែងការណ៍ផ្លូវការអំពីគោលបំណងពិតប្រាកដនៃការបង្កើនមូលធនចុះបញ្ជី និងផលប៉ះពាល់លើការអភិវឌ្ឍអាជីវកម្មនាពេលអនាគតនៅឡើយទេ។ ទោះយ៉ាងណា អ្នកវិភាគឧស្សាហកម្មជាច្រើនជឿថា ការបង្កើនមូលធននេះនឹងបង្កើនកម្លាំងហិរញ្ញវត្ថុរបស់ BYD បន្ថែមទៀត និងផ្តល់ការគាំទ្រផ្នែកហិរញ្ញវត្ថុសម្រាប់ការស្រាវជ្រាវបច្ចេកវិទ្យា ការពង្រីកទីផ្សារ និងប្លង់អាជីវកម្មនៅបរទេស។ ទោះជាយ៉ាងណា ផលប៉ះពាល់ពិតប្រាកដនៃការបង្កើនមូលធននេះ នៅត្រូវរង់ចាំតាមដានតាមលទ្ធផលប្រតិបត្តិការ និងសមិទ្ធផលអាជីវកម្មរបស់ក្រុមហ៊ុន។
