ក្រុមហ៊ុន Panasonic មានក្តីសង្ឃឹមខ្ពស់សម្រាប់ បន្ទះអាគុយ 4680 ថ្មីរបស់ក្រុមហ៊ុន Tesla ប៉ុន្តែបានទទួលស្គាល់ថា ការផលិតវាគឺជារឿងលំបាក។
បន្ទះអាគុយ 4680 ត្រូវបានដាក់បង្ហាញដោយ លោក Elon Musk កាលពីខែកញ្ញាកន្លងទៅ ហើយវានឹងក្លាយជាចំនុចសំខាន់ នៅក្នុងផែនការរបស់ក្រុមហ៊ុនផលិតរថយន្តខាងលើ ក្នុងការលក់ម៉ូដែលចេញក្រោយ ក្នុងតម្លៃត្រឹម ២៥ ០០០ ដុល្លារ។ ក្រុមហ៊ុន Tesla នឹងផលិតវាដោយខ្លួនឯងខ្លះ ប៉ុន្តែ Panasonic ក៏គ្រោងផលិតវាដែរ។
បន្ទះអាគុយ 4680 ថ្មីមានទំហំ ៥ ដងនៃ បន្ទះអាគុយ 1865 និង 2170 ដែល Panasonic ផ្គត់ផ្គង់ដល់ Tesla រួចទៅហើយ។ ទំហំធំជាងនេះមានន័យថា ត្រូវការបន្ទះអាគុយតិចជាងមុនដើម្បីផ្តល់ថាមពលឲ្យរថយន្ត។ នេះបើយោងតាមលោក Yasuaki Takamoto ប្រធានផ្នែកអាគុយរថយន្តអគ្គីសនីរបស់ក្រុមហ៊ុន Panasonic ហើយវាក៏មានន័យថា ត្រូវការគ្រឿងគ្រូវតិចជាងមុនដើម្បីបង្កើតកញ្ចប់អាគុយអគ្គិសនីនោះដែរ។
ទោះយ៉ាងណាក៏ដោយ វាមានគុណវិបត្តិខ្លះចំពោះបន្ទះអាគុយ 4680។ លោក Takamoto និយាយថា ពួកវាងាយនឹងឡើងកំដៅខ្លាំង ព្រោះវាពិបាកបំបែកកំដៅពីផ្នែកកណ្តាលរបស់វា។ មិនតែប៉ុណ្ណោះ វាក៏ងាយនឹងបង្កឲ្យឆាបឆេះនៅក្នុងរថយន្តអគ្គិសនីផងដែរ។ ជាសំណាងល្អ Panasonic ជឿជាក់ថា បទពិសោធន៍របស់ខ្លួនក្នុងការផលិតបន្ទះអាគុយ ២,៥ ពាន់លានគ្រឿងក្នុងមួយឆ្នាំ នឹងអាចផលិតបន្ទះអាគុយ 4680 ចេញមកដោយគ្មានបញ្ហាធំ៕