នៅក្នុងរយៈពេលត្រឹមតែមួយសប្តាហ៍ទៀតប៉ុណ្ណោះ សន្និសីទអ្នកអភិវឌ្ឍន៍ទូទាំងពិភពលោករបស់ Apple (WWDC 2025) នឹងធ្វើឡើងជាផ្លូវការហើយ ដោយព្រឹត្តិការណ៍នេះត្រូវបានគេរំពឹងថានឹងផ្តោតលើការរីកចម្រើននៃបច្ចេកវិទ្យា AI, ការអាប់ដេត iOS និង macOS ថ្មី ដែលមិនធ្លាប់មានពីមុនមក។
ក្នុងនោះ ទៅលើផ្នែកបច្ចេកវិទ្យា AI, Apple នឹងណែនាំអំពី Apple Foundation Models ដែលជាម៉ូឌែល AI របស់ខ្លួន ដែលអាចបើកឱ្យអ្នកប្រើប្រាស់អាចប្រើប្រាស់បានដើម្បីបន្ថែមមុខងារ AI ថ្មីៗទៅក្នុងកម្មវិធីរបស់ពួកគេ។ ម៉ូឌែល AI នេះ មានប៉ារ៉ាម៉ែត្រដល់ទៅ ៣ ពាន់លានប៉ារ៉ាម៉ែត្រ ឯណ្ណោះ ដែលអាចធ្វើការសង្ខេបអត្ថបទ និងកែតម្រូវអត្ថបទបានដោយស្វ័យប្រវត្តិ ប៉ុន្តែ Apple ក៏ត្រូវបានរំពឹងថានឹងប្រកាសចេញនូវមុខងារ AI តែមួយចំនួនតែប៉ុណ្ណោះ ដើម្បីប្រកាន់ខ្ជាប់ទៅនឹងផ្នែកសុវត្ថិភាព និងភាពឯកជនរបស់អ្នកប្រើប្រាស់ផងដែរ។
ចំពោះ iOS 26 វិញ នឹងក្លាយជាការអាប់ដេតដ៏ធំមួយដែលនាំមកនូវរបៀបគ្រប់គ្រងថាមពលថ្មថ្មី សមត្ថភាពបកប្រែដែលមានភាពច្បាស់លាស់ជាងមុន និងការរួមបញ្ចូលនូវ Siri ជំនាន់ថ្មីជាមួយកាស AirPods ដែលមុខងារថ្មីៗទាំងនេះត្រូវបានបំផុសគំនិតដោយ visionOS ដែលជាប្រព័ន្ធប្រតិបត្តិការសម្រាប់ Vision Pro ។
ចំណែក macOS ថ្មីវិញ នឹងមានឈ្មោះថា “macOS Tahoe” ដែលពាក្យ Tahoe នេះ គឺជាឈ្មោះបឹងដ៏ល្បីនៅរដ្ឋ California របស់សហរដ្ឋអាមេរិក។ ក្នុងនោះ ប្រព័ន្ធនេះក៏នឹងមានការរចនាថ្មីតាមបែប visionOS ផងដែរ។
ជាមួយគ្នានេះ Apple ផ្ទាល់ក៏កំពុងរៀបចំកម្មវិធីហ្គេមថ្មីមួយ ដើម្បីជំនួស Game Center ដើមផងដែរ ដែលកម្មវិធីនេះនឹងអាចដំណើរការលើ iOS, iPadOS, macOS និង tvOS បានទាំងអស់តែម្តង៕