រថយន្ត Volkswagen ID.Evo ជា SUV អគ្គិសនីទំហំធំ បានចេញពីខ្សែផលិតកម្មដំបូងនៅរោងចក្រ Volkswagen Anhui នៅប្រទេសចិន នៅថ្ងៃទី ២៦ ខែឧសភា។ រោងចក្រនេះជាសាខារបស់ Volkswagen ដែលជាភាគីជាដៃគូជាមួយក្រុមហ៊ុនផលិតរថយន្តចិន JAC (អតីតជាដៃគូជាមួយ Nio)។ រថយន្តនេះត្រូវបានគេបង្ហាញជាសាធារណៈលើកដំបូងនៅក្នុងពិព័រណ៍រថយន្តសៀងហៃក្នុងខែមេសា ២០២៥ និងគ្រោងនឹងចូលទីផ្សារចិននៅឆ្នាំ ២០២៦ ដើម្បីប្រជែងជាមួយ Aito M9 និង Li Auto L9 ដែលជាអ្នកដឹកនាំទីផ្សារបច្ចុប្បន្ន។
ការអភិវឌ្ឍន៍និងបច្ចេកវិទ្យា Volkswagen ID.Evo ត្រូវបានអភិវឌ្ឍជាដៃគូជាមួយក្រុមហ៊ុន Xpeng ហើយមានសមត្ថភាពខ្ពស់ក្នុងការចាប់អារម្មណ៍ពីអតិថិជនវ័យក្មេង។ វាប្រើបច្ចេកវិទ្យា E/E Architecture របស់ Xpeng ដែលត្រូវបានប្រើនៅលើម៉ូឌែល G9 និង G6។ អ្វីដែលពិសេស វាមានប្រព័ន្ធអគ្គិសនីខ្ពស់ 800V, ជំនួយសម្លេង AI, ចម្ងាយបើកបរ BEV លើសពី 700 គ.ម. (គិតតាមស្ដង់ដារ CLTC), និងប្រព័ន្ធជំនួយបើកបរ L2++។ Volkswagen អះអាងថា ID.Evo ត្រូវបានបង្កើតឡើងសម្រាប់ទីផ្សារចិនតែប៉ុណ្ណោះ ហើយមិនគ្រោងនាំចេញទៅផ្សារផ្សេងទេ។ ទោះជាយ៉ាងណា គេសង្ឃឹមថាវានិងមិនជួបបញ្ហាដូចរថយន្ត Volkswagen ID.Unyx ដែលបានបញ្ចេញកន្លងមក។
នេះជារឿងរ៉ាវនៃ Volkswagen ID.Unyx ដោយកន្លងមក Volkswagen Anhui ត្រូវបានបង្កើតឡើងក្នុងឆ្នាំ ២០១៧ ជាដៃគូស្មើរជាមួយក្រុមហ៊ុន JAC។ គម្រោងដំបូងរបស់ពួកគេ Sol E20X ដែលជារថយន្តអគ្គិសនីតូចមួយ បើទោះបីជាវាមានបម្លែងថ្មីៗក៏ដោយ ក៏មានការលក់ត្រឹមតែប្រហែល ៤,១០០ គ្រឿងប៉ុណ្ណោះ។ ក្រោយការបរាជ័យនោះ Volkswagen បានទិញភាគហ៊ុនភាគច្រើន និងបម្លែងឈ្មោះក្រុមហ៊ុនជា Volkswagen Anhui។ គម្រោងបន្ទាប់ ID.Unyx ដែលជារថយន្ត SUV Fastback ទំហំតូច បានចេញនៅទីផ្សារចិនជាមួយតម្លៃចាប់ពី ២៩,០០០ ដុល្លារ ប៉ុន្តែត្រូវបានអតិថិជនចោទថា “ថ្លៃពេក”។ ការលក់រថយន្តនេះគិតចាប់ពីខែកក្កដា ២០២៤ ដល់មិនា ២០២៥ មានត្រឹមតែ ៤,៤៣៨ គ្រឿងប៉ុណ្ណោះ។ បណ្តាលឲ្យ Volkswagen Anhui បញ្ចេញការខាតបង់ទឹកប្រាក់សរុប ១.៣៥ ពាន់លានយ័ន (ប្រហែល ១៨៦ លានដុល្លារ) ក្នុងឆ្នាំ ២០២៤។
ដូចនេះ Volkswagen ID.Evo អាចជាជំហានសំខាន់ក្នុងការស្ដារតំណែង Volkswagen Anhui នៅទីផ្សារចិនវិញ រថយន្តនេះមានរចនាបែបអនាគត បច្ចេកវិទ្យាចុងក្រោយ និងផ្ដោតលើកម្រិតតម្លៃនិងអតិថិជនវ័យក្មេង Volkswagen សង្ឃឹមថា វាអាចជួយផ្ដល់ប្រាក់ចំណេញវិញក្នុងឆ្នាំក្រោយ។
