បន្ទាប់ពីការហៅរថយន្តមកជួសជុលក្នុងខែមេសា ដែលប៉ះពាល់ដល់រថយន្ត SUV និងឡានដឹកទំនិញធំៗចំនួន 598,000 គ្រឿងក្នុងសហរដ្ឋអាមេរិក (721,000 គ្រឿងទូទាំងពិភពលោក) ដោយសារបញ្ហានៅលើម៉ាស៊ីន 6.2-លីត្រ V-8 ឥឡូវនេះ ក្រុមហ៊ុន General Motors (GM) ក៏ប្រឈមមុខនឹង សំណុំរឿងសុំសំណងជាថ្មី។ សំណុំរឿងនេះត្រូវបានដាក់ស្នើនៅថ្ងៃចន្ទ ទី 19 ឧសភា ដោយសារិយាល័យមេធាវី Hagens Berman នៅទីក្រុង Seattle នៅតុលាការសហរដ្ឋសម្រាប់តំបន់ខាងកើតរដ្ឋ Michigan។ អ្នកស្នើសុំអះអាងថា GM បានលក់រថយន្តដែលមានម៉ាស៊ីនកំហូចដោយចេតនា ទោះដឹងច្បាស់អំពីហានិភ័យសុវត្ថិភាពក៏ដោយ។
សំណុំរឿងនេះដែលមានអ្នកស្នើសុំពីរដ្ឋ Washington និង California បានលើកឡើងពីបញ្ហាដដែលៗនៃម៉ាស៊ីន L87 ជាពិសេសសម្រាប់រថយន្តឆ្នាំផលិត 2021 ដល់ 2024។ ដូចដែលបានរាយការណ៍ក្នុងការហៅរថយន្តមកជួសជុលនាពេលមុន GM បានឲ្យដឹងថា ប្រព័ន្ធម៉ាស៊ីនអាចមានកាកសំណល់ កំណកដែកនៅក្នុងម៉ាស៊ីន ឬក្នុងរន្ធប្រេង (crankshaft oil galleries) ដែលអាចនាំឲ្យ bearing ខូច។ GM ក៏បានស្គាល់ថា មានម៉ាស៊ីនខ្លះដែល crankshaft មិនទាន់គ្រប់លក្ខណៈស្តង់ដារផលិត។ បញ្ហាទាំងនេះអាចនាំទៅដល់ ការខូចម៉ាស៊ីនយ៉ាងធ្ងន់ធ្ងរ។
បញ្ហាម៉ាស៊ីនទាំងនេះបានកើតឡើងលើរថយន្តពេញនិយមមុនឆ្នាំ 2025 ដូចជា៖ Chevy Silverado 1500, Tahoe, Suburban, GMC Sierra 1500, Yukon, និង Cadillac Escalade។ ក្រៅពីបញ្ហាសុវត្ថិភាព អ្នកស្នើសុំក៏អះអាងថា បញ្ហានេះបណ្តាលឲ្យមានការខាតបង់ផ្នែកហិរញ្ញវត្ថុ ដោយសារតម្លៃរថយន្តធ្លាក់ចុះ។ ពួកគេក៏បាននិយាយថា ការប្តូរម៉ាស៊ីន L87 ថ្មីមិនអាចដោះស្រាយបញ្ហាខូច bearing បានពេញលេញនោះទេ ហើយបន្តបង្កហានិភ័យជាមួយម្ចាស់រថយន្ត។
ទោះបីជាបញ្ហានេះធ្វើឲ្យមានការព្រួយបារម្ភ ក៏ដោយ GM បានអះអាងថា បញ្ហានេះត្រូវបានដោះស្រាយសម្រាប់រថយន្តឆ្នាំ 2025។ ការស្រាវជ្រាវផ្ទៃក្នុងរបស់ GM បានរកឃើញកំហូចក្នុងដំណើរការផលិត ដែលមានឥទ្ធិពលលើម៉ាស៊ីនដែលផលិតចន្លោះពី ថ្ងៃទី 1 មិនា 2021 ដល់ 31 ឧសភា 2024។ ប៉ុន្តែសំណុំរឿងនេះក៏បានរួមបញ្ចូលរថយន្ត Silverado 1500 និង Sierra 1500 ដែលផលិតពីឆ្នាំ 2019 ជាដើមផងដែរ។
