នៅក្នុងបរិបទនៃសេដ្ឋកិច្ចពាណិជ្ជកម្មពិភពលោកកំពុងតែមានភាពមិនប្រាកដប្រជា និងសម្ពាធពន្ធនាំចេញរបស់សហរដ្ឋអាមេរិកលើប្រទេសជាច្រើននៅជុំវិញពិភពលោក ជាពិសេសប្រទេសចិន បានធ្វើឲក្រុមហ៊ុនធំៗជាច្រើនមានខាតបង់ប្រាក់ជាច្រើន តួយ៉ាងដូចជាក្រុមហ៊ុន Apple ជាដើម ដោយសារតែការធ្វើផលិតកម្មផលិតផលរបស់ពួកគេគឺស្ថិតនៅក្នុងប្រទេសចិន។
ក្នុងនោះ ដើម្បីគេចពីពន្ធទាំងនេះ Apple បានប្រកាសថា ពួកនឹងបំបែកខ្សែសង្វាក់ផលិតកម្មរបស់ខ្លួនទៅកាន់ប្រទេសផ្សេងៗដូចជាប្រទេសឥណ្ឌា និងវៀតណាម ជាដើមដើម្បីគេចចេញពីពន្ធនាំចេញរបស់អាមេរិកលើទំនិញចិន ប៉ុន្តែការធ្វើបែបនេះរបស់ Apple បានធ្វើឲប្រធានាធិបតី Donald Trump មានការមិនពេញចិត្តជាខ្លាំង ព្រោះពួកគេបានជ្រើសរើសការផលិត iPhone នៅក្នុងប្រទេសផ្សេង ជំនួសឲសហរដ្ឋអាមេរិក។
ទោះជាយ៉ាងណាក៏ដោយ ក៏ Apple បានបញ្ជាក់ថា ការធ្វើផលិតកម្មនៅក្នុងស្រុកគឺជារឿងពិបាកខ្លាំងដោយសារការខ្វះខាតនូវបច្ចេកវិទ្យា និងទេពកោសល្យក្នុងការធ្វើផលិតកម្ម ប៉ុន្តែពួកគេនឹងវិនិយោគធំបំផុតនៅអាមេរិកដោយមានចំនួនលើសពី 500 ពាន់លានដុល្លារ ក្នុងរយៈពេល 4 ឆ្នាំខាងមុខ។ ខណៈការវិនិយោគនេះ នឹងផ្តោតលើការច្នៃប្រឌិតបច្ចេកវិទ្យាថ្មីៗ, ការអភិវឌ្ឍផលិតកម្មក្នុងស្រុក, បញ្ញាសិប្បនិម្មិត (AI), វិស្វកម្មស៊ីលីកុន និងការអភិវឌ្ឍកម្លាំងពលកម្មក្នុងស្រុកជាដើម៕