កាលពីថ្មីៗនេះ ក្រុមហ៊ុន OpenAI ដែលជាក្រុមហ៊ុនធំរបស់ ChatGPT បានប្រកាសឲដឹងថា ពួកគេបានទិញយកក្រុមហ៊ុន AI startup មួយមានឈ្មោះថា “io” ។
ក្នុងនោះ កិច្ចព្រមព្រៀងនេះ OpenAI បានទិញយកក្រុមហ៊ុន “io” របស់លោក Jony Ive ដែលជាអតីតអ្នករចនាឧបករណ៍ឆ្នើមរបស់ Apple ក្នុងតម្លៃប្រមាណដល់ទៅ 6.5 ពាន់លានដុល្លារ ឯណ្ណោះ និងត្រូវបានសង្ស័យថាជាការទិញដ៏ធំបំផុតរបស់ OpenAI ចាប់តាំងពីបានបង្កើតក្រុមហ៊ុនមក។
គួរឲដឹងថា ក្រុមហ៊ុន “io” គឺជាផ្នែកមួយនៃក្រុមហ៊ុន LoveFrom ដែលត្រូវបានបង្កើតឡើងនៅក្នុងឆ្នាំ 2019 ដោយលោក Jony Ive។ ក្រុមហ៊ុននេះ មានបុគ្គលិកជំនាញចំនួន 55 នាក់ រួមមានអតីតវិស្វករ និងអ្នករចនាឧបករណ៍របស់ Apple លោក Scott Cannon, Evans Hankey និង Tang Tan។ ក្រោយពេលការទិញយកត្រូវបានបញ្ចប់ ក្រុមហ៊ុននេះនឹងចូលរួមជាមួយ OpenAI ដើម្បីបង្កើតឧបករណ៍ AI ថ្មី ដែលរំពឹងថានឹងប្រកាសចេញជាផ្លូវការនៅក្នុងឆ្នាំ 2026 ខាងមុខនេះ។
បើយោងតាមរបាយការណ៍របស់ Wall Street Journal បានឲដឹងថា ឧបករណ៍ដំបូងនេះ គឺជាឧបករណ៍ឆ្លាតវៃដែលទំហំតូច ប៉ុន្តែមិនមានអេក្រង់ទេ តែមានសមត្ថភាពយល់ដឹងពីបរិបទជុំវិញរបស់អ្នកប្រើ ដោយវាអាចបំពេញភារកិច្ចជំនួស ឬបន្ថែមលើស្មាតហ្វូន និងកុំព្យូទ័រយួរដៃដែលយើងប្រើប្រាស់សព្វថ្ងៃ ប៉ុន្តែមិនមែនជាឧបករណ៍ពាក់ដូចជាវ៉ែនតា ឬនាឡិកាឆ្លាតវៃទេ៕