បន្ទាប់ពីឃើញ Samsung ប្រកាសចេញនូវ Galaxy S25 Edge ដែលជាស្មាតហ្វូនស្តើង និងស្រាល ជាងគេក្នុងត្រកូល S25 ពេលនេះ ក្រុមហ៊ុន Apple ក៏ត្រូវបានគេរាយការណ៏ផងដែរថា នឹងប្រកាសចេញនូវស្មាតហ្វូនស្តើងនិងស្រាលដូចគ្នាដែរ ដើម្បីជំនួសម៉ូឌែល iPhone 17 Plus ដែលពួកគេគ្រោងនឹងលុបចោល។
បើនិយាយពីថាមពលថ្មរបស់ iPhone 17 Air របស់ Apple អាចនឹងមានត្រឹមតែ 2,800mAh ប៉ុណ្ណោះ ពោលគឺតិចជាង Galaxy S25 Edge របស់ Samsung ទៅទៀត។ ក្នុងនោះ បើប្រៀបធៀបនឹងទូរស័ព្ទ Spark Slim របស់ Tecno វិញ គឺខុសគ្នាដាច់ចង់តែ ៥០% ទៅហើយ ពោលគឺម៉ូឌែល Spark Slim របស់ Tecno នេះ ក៏ជាស្មាតហ្វូនដែលមានកម្រាស់ស្តើងមួយដែរ ដោយវាមានកម្រាស់ត្រឹមតែ 5.75mm និងទម្ងន់់ 164 ក្រាម ប៉ុណ្ណោះ ប៉ុន្តែមានថ្មធំដល់ទៅ 5,200mAh ឯណ្ណោះ។
ជាមួយគ្នានេះ បើតាមការអះអាងមួយបានឲដឹងថា iPhone 17 Air របស់ Apple អាចនឹងមានកម្រាស់ត្រឹមតែ 5.5mm និងទម្ងន់ 145 ក្រាម ប៉ុណ្ណោះ ដែលធ្វើឱ្យវាជាស្មាតហ្វូនស្រាលបំផុតមួយរបស់ Apple ដែលមិនធ្លាប់បានផលិត។
គួរបញ្ជាក់ផងថា បើទោះបីជាស្មាតហ្វូនមួយនេះអាចនឹងមានថ្មតែ 2,800mAh ក៏ដោយ ក៏ Apple អាចនឹងបន្ថែមសមត្ថភាពថាមពលពី 15–20% ទៀត ដើម្បីឆ្លើយតបនឹងបញ្ហានេះ ក៏ដូចជាបញ្ហាខាងមុខផងដែរ។
យ៉ាងណាមិញ iPhone 17 Air នេះ ក៏លេចឮថានឹងទទួលបាននូវអេក្រង់ Dynamic Island ទំហំ 6.6 អ៊ីញ ដែលមាន Refresh Rate 120Hz និង Camera Control ផងដែរ និងដំណើរការដោយបន្ទះឈីប A19 គាំទ្រការភ្ជាប់ Wi-Fi 7 ។ មិនត្រឹមតែប៉ុណ្ណោះ iPhone 17 Air របស់ Apple ក៏ត្រូវបានគេរំពឹងថានឹងមានតម្លៃលក់ទាបជាង iPhone 17 Pro ផងដែរ ពោលគឺអាចនឹងចាប់ពី ៩៩៩ដុល្លារ ប៉ុណ្ណោះ នៅក្នុងទីផ្សារអាមេរិក ដែលទំនងនឹងចេញនៅក្នុងខែកញ្ញា ឬខែតុលា ខាងមុខនេះ៕
