នេះជាចំណាត់ថ្នាក់ការដឹកជញ្ជូនរថយន្តអគ្គិសនី (NEV) របស់ក្រុមហ៊ុន startup នៅចិនប្រចាំខែមេសា នៅពេលដែលចូលដល់ខែឧសភា ក្រុមហ៊ុនផលិតរថយន្តអគ្គិសនី (NEV) startup នៅចិនបានចាប់ផ្តើមប្រកាសចំនួនការដឹកជញ្ជូនរថយន្តអោយទៅកាន់អតិថិជនសរុបប្រចាំខែមេសា។ រហូតមកដល់ពេលនេះ មានក្រុមហ៊ុនស្តាតអាប់ទាំងអស់៩ ដែលបានប្រកាសចំនួននេះ ជាមួយ Leapmotor ជាគ្រុមហ៊ុនដឹកជញ្ជូនរថយន្តអោយអតិថិជនបានច្រើនជាងគេ ដល់ទៅជាង ៤ម៉ឺនគ្រឿង ហើយនេះជាតារាងព័ត៌មានលម្អិតខាងក្រោម។
បើយោងតាមទិន្នន័យដែលបានបង្ហាញ Leapmotor គឺជាក្រុមហ៊ុន startup NEV ដោយមានការដឹកជញ្ជូនលើស ៤ម៉ឺនគ្រឿងក្នុងខែមេសាអោយទៅអតិថិជន ហើយបើគិតចាប់តាំងពីខែមករាដល់ខែមេសា Leapmotor បានដឹកជញ្ជូនរថយន្តសរុបចំនួន ១២៨,៥៩១ គ្រឿង ដោយបច្ចុប្បន្ន Leapmotor មានម៉ូឌែលសរុប ៦ ដែលកំពុងមានលក់ នៅក្នុងផ្សារ រួមមាន T03, C01, C11, C16, B01 និង C10។
ចំណាត់ថ្នាក់ទី ២ គឺ Xpeng ដែលបានដឹកជញ្ជូនរថយន្តអោយទៅអតិថិជនចំនួន ៣៥,០៤៥ គ្រឿងក្នុងខែមេសា បង្កើនឡើង ២៧៣% ប្រៀបធៀបទៅឆ្នាំមុន។ នេះបើគិតចាប់ពីខែមករាដល់ខែមេសា Xpeng មានចំនួនដឹកជញ្ជូនសរុប ១២៩,០៥៣ គ្រឿងអោយទៅអតិថិជន នៅខែមេសានេះ Xpeng ក៏បានបើកឱ្យដំណើរការម៉ូឌែលថ្មីឆ្នាំ ២០២៥ គឺ Xpeng X9 និង P7+ Ultra Long Range Max Flagship Edition។
ចំណាត់ថ្នាក់ទី ៣ គឺ Li Auto ដែលបានដឹកជញ្ជូនរថយន្តអោយទៅអតិថិជនចំនួន ៣៣,៩៣៩ គ្រឿង នៅក្នុងខែមេសានេះដែលបង្កើនបាន ៣១.៦% ប្រៀបធៀបនឹងឆ្នាំមុន។ ហើយបើគិតចាប់តាំងពីដើមឆ្នាំមក Li Auto បានដឹកជញ្ជូនសរុប ១,២៦០,៦៧៥ គ្រឿង។ រថយន្ត Li L6, L7, L8 និង L9 ក៏ជារថយន្ត SUV ដែលលក់បានល្អបំផុតក្នុងចំណោមម៉ូឌែលដែលមានតម្លៃលើស ២៧,៥០០ ដុល្លារ នៅក្នុងបីត្រីមាសជាប់គ្នា។
ចំណាត់ថ្នាក់ទី ៤ គឺ Xiaomi ដែលការដឹកជញ្ជូនរថយន្តអោយទៅអតិថិជនប្រចាំខែមេសានៅមានស្ថេរភាព ប្រៀបនឹងខែមីនាដែលមានចំនួន ២៩,០០០+ គ្រឿង ដោយឈានទៅដល់ចំនួនសរុបក្នុងឆ្នាំ ២០២៥ ជាង ៩៧,០០០ គ្រឿង។ នៅដើមខែមីនា ក្រុមហ៊ុន Xiaomi ក៏បានបង្កើនគោលដៅនៃការដឹកជញ្ជូនអោយទៅអតិថិជនប្រចាំឆ្នាំពី ៣០ម៉ឺន ឡើងទៅ ៣៥ម៉ឺនគ្រឿងផងដែរ។ នៅខែមិថុនា ឬ កក្កដា ឆ្នាំនេះ Xiaomi នឹងដាក់ឱ្យដំណើរការម៉ូឌែលទី ២ របស់ខ្លួនគឺ YU7។ បច្ចុប្បន្ន Xiaomi មានម៉ូឌែលលក់ ២ គឺ SU7 និង SU7 Ultra។
ចំណាត់ថ្នាក់ទី ៥ គឺក្រុមហ៊ុន Nio Group ដែលបានដឹកជញ្ជូនរថយន្តអោយទៅអតិថិជនចំនួន ២៣,៩០០ គ្រឿង បង្កើនឡើង ៥៣% ប្រៀបធៀបទៅឆ្នាំមុន។ ចំនួននេះរួមមានរថយន្តម៉ាក Nio ចំនួន ១៩,២៦៩ គ្រឿង និងម៉ាក Onvo ចំនួន ៤,៤០០ គ្រឿង។ ក្នុងរយៈពេល ៤ ខែដំបូងនៃឆ្នាំនេះ Nio Group បានដឹកជញ្ជូនរថយន្តអោយទៅអតិថិជនសរុប ៦៥,៩៩៤ គ្រឿង។
គួរចំណាំថា នៅថ្ងៃទី ២៩ មេសា កន្លងទៅនេះ ម៉ូឌែលដំបូងនៃម៉ាកទី ៣ របស់ក្រុមហ៊ុន Nio ដែលមានឈ្មោះ Firefly បានចាប់ផ្តើមដឹកជញ្ជូនជាផ្លូវការអោយទៅអតិថិជនហើយ។ សម្រាប់ ម៉ូឌែលទី ២ របស់ Onvo មានឈ្មោះ Onvo L90 ដែលបានបង្ហាញខ្លួននៅកម្មវិធីបង្ហាញរថយន្តសាំងហៃ គ្រោងនឹងដាក់ឱ្យដំណើរការក្នុងត្រីមាសទី ៣។
