នៅក្នុងសន្និសីទបច្ចេកវិទ្យាអាមេរិកខាងជើងឆ្នាំ ២០២៥ ក្រុមហ៊ុនបច្ចេកវិទ្យាយក្សរបស់តៃវ៉ាន់ TSMC បានបង្ហាញចេញនូវបច្ចេកវិទ្យាឈីបជំនាន់ថ្មីមួយរបស់ខ្លួនដែលគេហៅថា A14 ដែលជាឈីបដែលស្ថិតនៅលើបច្ចេកវិទ្យា 1.4nm ដំបូងគេបង្អស់នៅលើពិភពលោក។
បច្ចេកវិទ្យាឈីប 1.4nm នេះ នឹងចូលទៅក្នុងការផលិតជាផ្លូវការក្នុងឆ្នាំ 2028 ហើយវាត្រូវបានគេចាត់ទុកថាជាចំនុចប្រែប្រួលដ៏ធំមួយពីបច្ចេកវិទ្យាដំណើរការ N2 ឬ 2nm ។ ក្នុងនោះ TSMC បានអះអាងថា បើប្រៀបធៀបទៅនឹងឈីប 2nm, ឈីប 1.4nm គឺវាអាចផ្តល់នូវល្បឿនកាន់តែខ្ពស់ដល់ទៅ 15% នៅពេលប្រើថាមពលដូចគ្នា ឬអាចបន្ថយការប្រើប្រាស់ថាមពលដល់ទៅ 30% នៅក្នុងល្បឿនដូចគ្នា ព្រមទាំងមានភាពប្រសើរឡើងជាង 20% ក្នុងដង់ស៊ីតេតក្កវិជ្ជា ដែលមានន័យថាឈីបនេះនឹងមានកម្រិតតូចជាង តែមានសមត្ថភាពខ្ពស់ជាងមុន។
បន្ថែមលើនេះ ឈីប 1.4nm ក៏នឹងគាំទ្របច្ចេកវិទ្យា Super Power Rail ដែលជាវិធីបែងចែកថាមពលថ្មីមួយដែលមានគោលបំណងធ្វើឲ្យប្រសិទ្ធភាពក្នុងការប្រើប្រាស់ថាមពលកាន់តែប្រសើរឡើងផងដែរ ប៉ុន្តែសម្រាប់ជម្រើសដែលរួមបញ្ចូលនូវបច្ចេកវិទ្យា Super Power Rail នេះ នឹងចាប់ផ្ដើមការផលិតនៅឆ្នាំ 2029 នោះទេ។ គួរឲដឹងថា ឈីបដំណើរការជំនាន់ថ្មី A14 របស់់ TSMC ត្រូវបានរចនាឡើងដើម្បីគាំទ្រការអភិវឌ្ឍន៍បញ្ញាសិប្បនិម្មិត (AI) ទាំងក្នុងម៉ាស៊ីនមេ និងឧបករណ៍ edge devices ដែលកំពុងកើនឡើងយ៉ាងខ្លាំងនាពេលបច្ចុប្បន្ននេះ៕