ស្ត្រីធ្វើការនៅនូវែលសេឡង់ នឹងបានឈប់សម្រាកមានប្រាក់ឈ្នួលដោយស្វ័យប្រវត្តិ បន្ទាប់ពីរលូតកូន

រដ្ឋសភានៃប្រទេសនូវែលសេឡង់បានអនុម័តច្បាប់ជាឯកច្ឆន្ទ ដោយផ្តល់សិទ្ធិដល់ម្តាយដែលកំពុងធ្វើការ និងដៃគូរបស់ពួកគេ មានសិទ្ធិទទួលបានការឈប់សម្រាក បន្ទាប់ពីទទួលរងការរលូតកូន ដែលត្រូវបានគេជឿជាក់ថា ជាបទប្បញ្ញត្តិទីមួយនៃច្បាប់ប្រភេទនៅក្នុងពិភពលោក។

ពាណិជ្ជកម្ម

ប្រាក់ឧបត្ថម្ភនេះត្រូវបានអនុម័តដោយសភានៃប្រទេសនូវែលសេឡង់ កាលពីល្ងាចថ្ងៃពុធ ទី២៤ ខែមីនា ផ្តល់ឲ្យនិយោជិកឈប់សម្រាក ៣ថ្ងៃ នៅពេលដែលការមានផ្ទៃពោះបញ្ចប់ដោយការរលូតកូន ជាជាងបង្ខំឲ្យពួកគេប្រើច្បាប់ឈប់សម្រាកឈឺ។

សមាជិកសភានៃប្រទេសនូវែលសេឡង់ លោកស្រី Ginny Andersen បាននិយាយថា ការរលូតកូនគួរតែត្រូវបានគេទទួលស្គាល់ ជាមួយនឹងការផ្តល់ឲ្យនូវថ្ងៃឈប់សម្រាក។

លោកស្រីបានប្រាប់ទៅសភាថា៖ “ទុក្ខសោកដែលកើតឡើងដោយការរលូតកូនមិនមែនជាជំងឺទេ វាគឺជាការបាត់បង់ ហើយការបាត់បង់នោះត្រូវការពេលវេលាដើម្បីជាសះស្បើយរាងកាយ និងពេលវេលាដើម្បីជាសះស្បើយខាងផ្លូវចិត្តផងដែរ”៕