ក្នុងពេលថ្មីៗនេះ ក្រុមហ៊ុន OpenAI ដែលជាក្រុមហ៊ុនធំរបស់ ChatGPT ត្រូវបានគេរាយការណ៍ថា កំពុងបង្ហាញពីចំណាប់អារម្មណ៍ដ៏ធំមួយក្នុងការទិញយកកម្មវិធីតាមបណ្តាញអ៊ីនធឺណិត Chrome ពីក្រុមហ៊ុន Google ប្រសិនបើតុលាការអាមេរិកសម្រេចឱ្យ Google ត្រូវបែងចែកអាជីវកម្មរបស់ខ្លួនដើម្បីបញ្ចប់ភាពផ្តាច់មុខក្នុងវិស័យស្វែងរកតាមអ៊ីនធឺណិត។
ក្នុងនោះ ការអះអាងនេះ ត្រូវបានបង្ហាញក្នុងការផ្តល់សក្ខីកម្មរបស់ប្រធានផលិតផលក្រុមហ៊ុន ChatGPT លោក Nick Turley នៅក្នុងការសវនាការប្រឆាំងភាពផ្តាច់មុខរបស់ Google នៅក្នុងទីក្រុងវ៉ាស៊ីនតោន។
ជាមួយគ្នានេះ លោក Turley ក៏បានអះអាងផងដែរថា ក្នុងពេលបច្ចុប្បន្ននេះ ក្រុមហ៊ុន OpenAI មិនបានមានភាពជាដៃគូជាមួយ ក្រុមហ៊ុន Google នោះឡើយ ប៉ុន្តែធ្លាប់បានស្នើក្រុមហ៊ុន Google ដើម្បីប្រើ API របស់ពួកគេ សម្រាប់បន្ថែមសមត្ថភាពដល់ ChatGPT ប៉ុន្តែត្រូវបានបដិសេធ និងបានផ្លាស់ប្តូរទៅប្រើបច្ចេកវិទ្យា Bing របស់ Microsoft ជំនួសវិញ។
គួរឲដឹងថា ប្រសិនបើសិនជាតុលាអាមេរិកអាចសម្រេចឱ្យ Google លក់ Chrome ឬផ្តាច់ខ្លួនចេញពីសេវាផ្សេងៗរបស់ពួកគេបានដោយជោគជ័យ នោះក្រុមហ៊ុន OpenAI នឹងពិចារណាទិញយក Chrome ពី Google ដើម្បីជំរុញសេវាកម្មរបស់ខ្លួនឱ្យកាន់តែប្រសើរឡើងស្របពេលដែលវិស័យបច្ចេកវិទ្យាកំពុងតែមានការប្រកួតប្រជែងកាន់តែខ្លាំង៕