នៅពេលដែលក្រុមហ៊ុនធំៗក្នុងឧស្សាហកម្មស្មាតហ្វូនកំពុងប្រកួតប្រជែងគ្នាក្នុងផ្នែកថាមពលថ្ម ក្រុមហ៊ុន Honor ត្រូវបានរំពឹងថានឹងក្លាយជាក្រុមហ៊ុនដំបូងគេក្នុងពិភពលោកដែលបញ្ចេញស្មាតហ្វូនដែលមានថាមពលថ្មធំដល់ 8,000 mAh។ ដែលនេះគឺជាកម្រិតថ្មីមួយសម្រាប់ទូរស័ព្ទដៃនៅក្នុងឆ្នាំ 2025 ដែលសង្កត់ធ្ងន់ទៅលើការប្រើប្រាស់បានយូរជាពិសេសសម្រាប់អ្នកប្រើប្រាស់តម្រូវការខ្ពស់។
បើយោងតាម Digital Chat Station បានបញ្ជាក់ថា ក្រុុមហ៊ុន Honor នឹងប្រកាសចេញស្មាតហ្វូនស៊េរីថ្មីរបស់ខ្លួននេះជាផ្លូវការនៅថ្ងៃទី 15 ខែមេសា ខាងមុខ ក្រោមឈ្មោះថា “Power” ។
គួរឲដឹងថា សម្រាប់ពេលបច្ចុប្បន្ននេះ ស្មាតហ្វូនដែលមានថ្មធំជាងគេគឺមានថាមពលប្រហែល 7,050 mAh តែប៉ុណ្ណោះ ដូច្នេះ ប្រសិនបើក្រុមហ៊ុន Honor ប្រកាសចេញនូវស្មាតហ្វូនថ្ម 8,000 mAh នៅសប្តាហ៍ក្រោយពិតមែន នោះវានឹងក្លាយជាស្មាតហ្វូនដំបូងគេក្នុងពិភពលោកដែលមានថ្មធំបំផុតក្នុងស្តង់ដារស្មាតហ្វូនសព្វថ្ងៃ។
ខណៈក្រៅពីក្រុមហ៊ុន Honor, ក្រុមហ៊ុន OnePlus, Oppo និង Realme របស់ BBK Electronics ក៏គ្រោងនឹងចេញនូវស្មាតហ្វូនដែលមានថ្ម 8,000 mAh ផងដែរ។ តួយ៉ាងដូចជាក្រុមហ៊ុន Realme នឹងបង្ហាញចេញនូវ Realme GT8 Pro របស់ខ្លួននៅក្នុងពេលឆាប់ៗខាងមុខនេះ ដែលនឹងភ្ជាប់មកជាមួយថ្ម 8,000 mAh ដូចគ្នានឹងស្មាតហ្វូនរបស់ Honor ដែល និងគាំទ្រការសាកថ្មល្បឿនលឿនកម្លាំង 80W ដែលអាចសាកពេញក្នុងពេលតែ 70 នាទីប៉ុណ្ណោះ៕