កន្លងមក ក្រុមហ៊ុន Samsung តែងតែប្រកាសចេញ One UI កំណែថ្មីរបស់ខ្លួនជាមួយនឹងស្មាតហ្វូនស៊េរី Galaxy S ជារៀងរាល់ឆ្នាំ ដូចជា One UI 5 ជាមួយ Galaxy S22, One UI 6 ជាមួយ S23 និង One UI 7 ជាមួយ Galaxy S25។ ប៉ុន្តែឆ្នាំនេះ ទំនងជានឹងមានការផ្លាស់ប្តូរ ដោយស្មាតហ្វូនបត់របស់ Samsung រួមមាន Galaxy Z Flip 7 និង Z Fold 7 ត្រូវបានរាយការណ៍ថា នឹងជាស្មាតហ្វូនដំបូងបង្អស់ដែលដំណើរការជាមួយ One UI 8 ដែលផ្អែកលើប្រព័ន្ធ Android 16 ។
ក្នុងនោះ ពេលវេលានៃការចេញ Android 16 របស់ Google អាចនឹងធ្វើឡើងនៅក្នុងខែមិថុនា ឬខែកក្កដា ដែលជាពេលត្រូវគ្នាជាមួយពេលវេលារបស់ Samsung ដែលគ្រោងនឹងបង្ហាញស្មាតហ្វូនអាចបត់របស់ខ្លួនផងដែរ។
បើយោងតាមរូបភាព និងព៌ត័មានដែលបានលេចធ្លាយ Z Fold 7 នឹងមានការរចនាស្តើងជាងមុន ដោយមានកម្រាស់ត្រឹមតែ 4.5mm ប៉ុណ្ណោះ នៅពេលបើកលាតពេញ។ ខណៈពេលដែល Z Flip 7 វិញ ក៏នឹងទទួលបានការរចនាថ្មីផងដែរ។ មិនត្រឹមតែប៉ុណ្ណោះ ស្មាតហ្វូនទាំងពីរនេះ ក៏ត្រូវបានរំពឹងថានឹងប្រើបន្ទះឈីប Snapdragon 8 Elite និងមានថាមពលថ្មធំជាងជំនាន់មុនផងដែរ។ ខណៈព៌ត័មានលម្អិតផ្សេងទៀតមិនទាន់ត្រូវបានបង្ហាញចេញនៅឡើយទេ៕