ក្នុងឱកាសគម្រប់ខួប 15 ឆ្នាំរបស់ក្រុមហ៊ុន Xiaomi នៅថ្ងៃទី 6 ខែមេសា, ក្រុមប្រឹក្សាភិបាលកំពូលរបស់ក្រុមហ៊ុន Xiaomi រួមមានស្ថាបនិកលោក Lei Jun និងសហស្ថាបនិក Lin Bin បានប្រកាសជាផ្លូវការថា Xiaomi 15S Pro ដែលជាស្មាតហ្វូនម៉ូដែលថ្មីនៅក្នុងស៊េរី S នឹងប្រកាសចេញលក់នៅក្នុងឆ្នាំ២០២៥ នេះ (ប្រហែលនៅចុងខែមេសានេះ) បន្ទាប់ពីស្ងប់ស្ងាត់អស់រយៈពេលជាច្រើនឆ្នាំ។
ក្នុងនោះ បើយោងតាម DigitalChatStation បាននិយាយថា Xiaomi 15S Pro នឹងរក្សាការរចនាកម្រិតខ្ពស់របស់វាដដែលជាមួយអេក្រង់ 2K quad-curved, កាមេរ៉ា Leica ចំនួន ៣ គ្រាប់ និងការសាកថ្មល្បឿនលឿនកម្លាំង 90W ។ លើសពីនេះ វាក៏នឹងទទួលបានថ្មធំផងដែរ ពោលគឺអាចនឹងលើស 6,000mAh ដែលធ្វើឱ្យការប្រើប្រាស់កាន់តែមានភាពប្រសើរយ៉ាងច្រើន។
ចំពោះលក្ខណៈពិសេសដ៏គួរឱ្យចាប់អារម្មណ៍មួយទៀតនោះគឺ ក្រុមហ៊ុនអាចនឹងប្រើបន្ទះឈីបដែលផលិតដោយខ្លួនឯងតែម្តង ដែលស្ថិតនៅលើបច្ចេកវិទ្យា N4P របស់ TSMC ហើយត្រូវបានគេប៉ាន់ប្រមាណថាអាចមានសមត្ថភាពប្រកួតប្រជែងជាមួយនឹង Snapdragon 8 Gen 1 និង Gen 2 រួមជាមួយបច្ចេកវិទ្យា UWB (Ultra Wideband) ដែលនឹងប្រើប្រាស់ក្នុងរថយន្ត Xiaomi SU7 EV នាពេលខាងមុខ។ ខណៈព៌ត័មានលម្អិតផ្សេងទៀតមិនទាន់បង្ហាញចេញនៅឡើយទេ៕