ក្រុមហ៊ុន Reliance Jio ដែលជាក្រុមហ៊ុនទូរគមនាគមន៍ធំជាងគេនៅក្នុងប្រទេសឥណ្ឌា ដែលគ្រប់គ្រងដោយសម្ព័ន្ធ Reliance Industries និងដឹកនាំដោយមហាសេដ្ឋី Mukesh Ambani បានប្រកាសចុះកិច្ចព្រមព្រៀងជាមួយក្រុមហ៊ុន SpaceX របស់មហាសេដ្ឋី Elon Musk ដើម្បីនាំយកសេវាអ៊ីនធឺណិតតាមផ្កាយរណប Starlink មកកាន់ប្រទេសឥណ្ឌា។
ក្រោមកិច្ចព្រមព្រៀងនេះ SpaceX នឹងប្រើប្រាស់នូវឧបករណ៍ និងបណ្តាញរបស់ក្រុមហ៊ុន Reliance Jio ក្នុងការផ្តល់សេវាអ៊ីនធឺណិតតាមផ្កាយរណប Starlink រាប់ពាន់កន្លែងនៅទូទាំងប្រទេសឥណ្ឌា។ ខណៈការផ្លាស់ប្តូរនេះ បានធ្វើឱ្យមានការភ្ញាក់ផ្អើលជាខ្លាំងបន្ទាប់ពីមានការប្រកួតប្រជែងគ្នាជាច្រើនខែ។
សម្រាប់ចំណុចពិសេសចំនួនមួយផ្សេងទៀតដែលកើតឡើងនៅក្រោយកិច្ចព្រមព្រៀងនេះ គឺបណ្តាលមកពីការព្រួយបារម្ភពីមហាសេដ្ឋីជំនួញឥណ្ឌា Mukesh Ambani អំពីការគ្របដណ្តប់របស់ Starlink លើវិស័យទូរគមនាគមន៍របស់ប្រទេសខ្លួន ដែលបានចុះនូវកិច្ចសហការដូចគ្នារវាង Starlink និង Bharti Airtel ដែលជាក្រុមហ៊ុនទូរគមនាគមន៍ធំទី ២ របស់ឥណ្ឌា។
- គួរឲដឹងថា ក្រុមហ៊ុន SpaceX របស់មហាសេដ្ឋី Elon Musk បានរង់ចាំការផ្តល់នូវអាជ្ញាបណ្ណក្នុងនាំយកសេវាអ៊ីនធឺណិតតាមផ្កាយរណប Starlink របស់ខ្លួនមកកាន់ប្រទេសឥណ្ឌាចាប់តាំងពីឆ្នាំ ២០២០ មកម្លេះ ដោយសារតែការព្រួយបារម្ភអំពីសន្តិសុខជាតិនៅក្នុងប្រទេសឥណ្ឌា។ បន្ថែមពីនេះ លោក Elon Musk ផ្ទាល់បានរំពឹងថា ការសហការគ្នានេះ នឹងបង្កើនតម្លៃទីផ្សារក្រុមហ៊ុនខ្លួនដល់ 1.9 ពាន់លានដុល្លារ នៅឆ្នាំ 2030 ។ ក្រៅពីការសហការនេះ ក៏មានការសហការនៅក្នុងវិស័យផ្សេងទៀតផងដែរ ដូចជាការចូលរួមរបស់លោក Elon Musk ក្នុងការបើកហាងតាំងបង្ហាញរថយន្ត Tesla ក្នុងប្រទេសឥណ្ឌា ទោះបីជាមានបញ្ហាទាក់ទងនឹងពន្ធនាំចូលរថយន្តអគ្គិសនីក៏ដោយ៕