នៅក្នុងសន្និសីទជាមួយតំណាងធុរកិច្ចអាមេរិកនៅទីក្រុងហាណូយ នាយករដ្ឋមន្រ្តីវៀតណាម, លោក Pham Minh Chinh បានប្រកាសផ្លូវការឲដឹងថា រដ្ឋាភិបាលវៀតណាមត្រៀមនឹងផ្តល់អាជ្ញាប័ណ្ណដល់ប្រព័ន្ធ Internet តាមផ្កាយរណប Starlink របស់លោក Elon Musk ជាលើកដំបូង។
ក្នុងនោះ ក្រុមហ៊ុន SpaceX ដែលជាក្រុមហ៊ុនធំរបស់ Starlink បានស្នើសុំការវិនិយោគប្រមាណ 1.5 ពាន់លានដុល្លារ ដើម្បីនាំយកសេវាអ៊ីនធឺណិតផ្កាយរណប Starlink ទៅកាន់ប្រទេសវៀតណាមក្នុងលក្ខខណ្ឌសាកល្បងរហូតដល់ឆ្នាំ 2030។
គួរគូសបញ្ជាក់ថា ការលែងដៃពីសិទ្ធិផ្តាច់មុខរបស់រដ្ឋវៀតណាមលើប្រព័ន្ធទូរគមនាគមន៍ផ្កាយរណបនេះ មានគោលបំណងដើម្បីទាក់ទាញការវិនិយោគពីបរទេស និងអនុញ្ញាតឱ្យក្រុមហ៊ុនបរទេសដូចជា Starlink ចូលវិនិយោគក្នុងទីផ្សារវៀតណាមបានស្រួលជាងមុន។ ទោះបីជាយ៉ាងណាក៏ដោយ ក៏ការប្រតិបត្ដិការទាំងស្រុងនឹងត្រូវបានត្រួតពិនិត្យយ៉ាងតឹងរ៉ឹងពីសំណាក់មន្ត្រីពាក់ពន្ធ និងរាជរដ្ឋាភិបាល។
គួរឲដឹងថា កាលពីមុន អង្គភាពបរទេសមិនត្រូវបានអនុញ្ញាតឱ្យកាន់កាប់ទាំងស្រុង ឬដំណើរការសេវាអ៊ីនធឺណិតតាមផ្កាយរណបនៅក្នុងប្រទេសវៀតណាមឡើយ។ ប្រសិនបើពួកគេចង់វិនិយោគត្រូវបង្កើតការបណ្តាក់ទុនរួមគ្នាជាមួយក្រុមហ៊ុនក្នុងស្រុក ដែលជារឿយៗទាមទារឱ្យដៃគូក្នុងស្រុកកាន់កាប់ភាគហ៊ុនភាគច្រើន បន្ថែមពីលើការទទួលការយល់ព្រមពីសំណាក់ដ្ឋាភិបាលដើម្បីដំណើរការ ខណៈទិន្នន័យរបស់អ្នកប្រើប្រាស់វៀតណាមនឹងត្រូវរក្សាទុកក្នុងប្រទេស។
ខណៈកាលពីពេលថ្មីៗនេះ ក្រុមហ៊ុន SpaceX របស់លោក Elon Musk ក៏កំពុងស្វែងរកឱកាសវិនិយោគនៅក្នុងប្រទេសកម្ពុជាយើងផងដែរ៕