ក្រុមហ៊ុន Apple បានប្រកាសដាក់បង្ហាញចេញនូវ MacBook Air ថ្មីរបស់ខ្លួន ផ្តល់ជូនទាំងជម្រើសអេក្រង់ទំហំ ១៣ អ៊ីញ និង ១៥ អ៊ីញ ជាមួយនឹងបន្ទះឈីប M4 ចុងក្រោយបង្អស់ដែលជាអ្នកស្នងតំណែងពីម៉ូដែល M3 កាលពីឆ្នាំមុន។ ជាមួយនឹងបន្ទះឈីប M4 នេះ ក្រុមហ៊ុន Apple ផ្ទាល់បានសន្យាថានឹងមានប្រសិទ្ធភាពថាមពលថ្មដល់ទៅ 18 ម៉ោង ទទួលបានកាមេរ៉ាថ្មីទំហំ 12MP Center Stage និងតម្លៃចាប់ផ្តើមទាបជាង។
ក្នុងនោះ ក្រុមហ៊ុនបាននិយាយថា បន្ទះឈីប M4 មានស៊ីភីយូ 10-core, GPU រហូតដល់ទៅ 10-core និង 16-core Neural Engine បូករួមជាមួយ RAM និងអង្គផ្ទុកទិន្នន័យ SSD រហូតដល់ 32GB+2TB ធ្វើឱ្យ MacBook Air ថ្មីនេះលឿនជាងម៉ូដែល M1 ដល់ទៅ 2 ដង។ ប៉ុន្តែបើប្រៀបធៀបទៅនឹង MacBook Air ដែលមានមូលដ្ឋានលើ Intel ដែលមានល្បឿនលឿនបំផុត ម៉ូដែល M4 នេះផ្តល់នូវដំណើរការលឿនជាង 23 ដង។
បន្ថែមពីនេះ Apple ក៏បានដាក់បញ្ជូល និងអាប់ឌែតទៅលើកាមេរ៉ា 12MP Center Stage ផងដែរ សន្យាថាមានគុណភាពវីដេអូប្រសើរឡើង និងគាំទ្រមុខងារ Desk View ។
ជាមួយគ្នានេះ វាទទួលបានរន្ធ Thunderbolt 4 ជាច្រើន គាំទ្រ MagSafe 3, Wi-Fi 6E និង ប៊្លូធូស 5.3 មានជម្រើសពណ៌ Midnight, Starlight, Silver និងពណ៌ថ្មី Sky Blue ជាមួយតម្លៃលក់ចាប់ពី 999 ដុល្លារ និង ១ ១៩៩ដុល្លារ៕