នៅក្នុងព្រឹត្តិការណ៍ MWC ឆ្នាំ 2025 ក្រុមហ៊ុន TECNO បានបង្ហាញចេញនូវគំរូស្មាតហ្វូនថ្មីមួយដែលជាស្មាតហ្វូនដែលមានកម្រាស់ស្តើងបំផុតនៅក្នុងពិភពលោកនាពេលបច្ចុប្បន្ននេះ។ សម្រាប់ស្មាតហ្វូនមួយនេះ មានឈ្មោះថា TECNO SPARK Slim។ វាត្រូវបានរចនាឡើងដោយមានកម្រាស់ត្រឹមតែ ៥,៧៥មីលីម៉ែត្រ តែប៉ុណ្ណោះ ប៉ុន្តែអ្វីដែលចាប់អារម្មណ៍ខ្លាំងនោះគឺមិនត្រឹមតែមានកម្រាស់ស្តើងតែប៉ុណ្ណោះនោះទេ ថែមទាំងមានថ្មច្រើនទៀតផង ដល់ទៅ 5,200 mAh ឯណ្ណោះ ពោលគឺលើសថាមពលថ្មរបស់ S25 Ultra ទៅទៀត។
ទៅលើការរចនារបស់វា ត្រូវបានរចនាជាមួយការរចនាបែបស្មាតហ្វូនអនាគត ស្រដៀងនឹង Google Pixel និង iPhone 17 Air មានកាមេរ៉ាផ្នែកខាងក្រោយចំនួន ២ គ្រាប់ ដូចភ្នែកកង្កែបលោតភ្លើងចុះឡើងៗ ទំហំ ៥០មេហ្គាភិកសែល និងកាមេរ៉ាផ្នែកខាងមុខទំហំ ១៣ មេហ្គាភិកសែល ប្រើប្រាស់នូវអេក្រង់ AMOLED ទំហំ 6.78 អ៊ីញ មានកម្រិត 1.5K 144Hz អាចជះពន្លឺបានខ្ពស់បំផុត 4,500 nits ។
គួរបញ្ជក់ថា ស្មាតហ្វូននេះគ្រាន់តែជាគំរូដែលក្រុមហ៊ុន TECNO បានផលិតមកតាំងបង្ហាញប៉ុណ្ណោះ មិនទាន់មានការផលិតសម្រាប់លក់នៅលើទីផ្សារនៅឡើយទេ ខណៈតម្លៃវិញក៏មិនត្រូវបានបង្ហាញចេញនោះដែរ។
ក្រៅពីស្មាតហ្វូនស្តើងមួយនេះ ក្រុមហ៊ុន TECNO ក៏បានដាក់បង្ហាញចេញនូវគំរូឧបករណ៍ថ្មីៗជាច្រើនរបស់ខ្លួនផងដែរ រួមមានទូរស័ព្ទដៃ TECNO CAMON 40 Series ជាទូរស័ព្ទដែលប្រើប្រាស់នូវបច្ចេកវិទ្យា One-Tap FlashSnap ដែលអាចថតរូបបានលឿនបំផុត, វែនតាឆ្លាតវៃ AR AI Smart Glasses, កុំព្យូទ័រដែលមានទម្ងន់ស្រាលបំផុតក្នុងពិភពលោក MEGABOOK S14, នាឡិកាឆ្លាតវៃថ្មី, កាសស្តាប់ត្រចៀក, ទូរស័ព្ទបត់ ៣ តង់ PHANTOM Ultimate 2 និងបច្ចេកវិទ្យា Starry Optical Fiber ដែលជាបច្ចេកវិទ្យាដែលអាចបង្កើតពន្លឺដូចផ្កាយនៅលើខ្នងទូរស័ព្ទជាដើម ដោយឧបករណ៍ទាំងនេះសុទ្ធសឹងតែភ្ជាប់មកជាមួយនឹងប្រព័ន្ធ AI ដើម្បីធ្វើឱ្យការប្រើប្រាស់របស់អ្នកប្រើប្រាស់កាន់តែមានប្រសិទ្ធភាព៕
