ក្រុមហ៊ុន Apple បានប្រកាសដាក់បង្ហាញចេញនូវ iPad ថ្មីរបស់ខ្លួន (សេរ៊ីឆ្នាំ២០២៥) ជំនាន់ទី១១ រួមជាមួយនឹងបន្ទះឈីប A16 ថ្មី និងការអាប់ឌែតលក្ខណៈពិសេសបន្តិចបន្តួច និងការរចនាមូលដ្ឋានដូចគ្នាទៅនឹងជំនាន់មុនរបស់វាចាប់ពីឆ្នាំ 2022 ដែរ។
សម្រាប់ iPad ថ្មីនេះ បានបង្កើនទំហំផ្ទុកទ្វេដងចាប់ពី 128GB ដល់ 512GB ដំណើរការជាមួយបន្ទះឈីប Apple A16 ដែលជាបន្ទះឈីបជំនាន់ថ្មីរបស់ Apple មាន CPU 5-core, GPU 4-Core និង 16-core Neural Engine ដែលមានសមត្ថភាពលឿនជាងជិត 30% បើប្រៀបធៀបនឹងជំនាន់មុន ហើយបានធ្វើឱ្យប្រសើរឡើងដល់ 50% នៅក្នុងដំណើរការទាំងមូល។ ក្នុងនោះក្រុមហ៊ុនបាននិយាយថា ឈីបថ្មីនេះគឺលឿនជាង 6ដង បើប្រៀបធៀបនឹងថេប្លេត Android ដែលលក់ដាច់ជាងគេ ប៉ុន្តែវានៅតែមានអេក្រង់ Liquid Retina ទំហំ 10.9 អ៊ីញ ដដែល ដំណើរការលើ iPadOS 18 តែមិនគាំទ្រ Apple Intelligence នោះទេ ដូចនេះ iPad មួយនេះអាចនឹងមាន RAM តិចជាង 8GB ។
ជាមួយគ្នានេះ ការបន្ថែមថ្មីតែមួយគត់គឺ Bluetooth 5.3 ដែលជំនួសឲ Bluetooth 5.2 នៅលើ iPad ជំនាន់ទី 10 ។ ក្រៅពីនេះ វានៅតែបន្តប្រើប្រាស់នូវកាមេរ៉ាទំហំ 12MP និង Touch ID ដដែល គាំទ្រការភ្ជាប់ Wi‑Fi 6, 5G និងទទួលបានរន្ធ microphone ចំនួន ២ និង Landscape stereo speakers ។
តួយ៉ាង iPad ថ្មីនេះ គឺទទួលបានជម្រើសពណ៌ Blue, Pink, Silver និង Yellow អាចប្រើប្រាស់លើការមើលវិដេអូបានរហូតដល់ ១០ម៉ោង មានតម្លៃលក់ចាប់ពី ៣៤៩ ដុល្លារ នៅក្នុងទីផ្សារអាមេរិក៕