យោងតាមប្រភពព័ត៌មានបាឲ្យដឹងថា រដ្ឋាភិបាលចិនចង់ឲ្យក្រុមហ៊ុន Alibaba Group Holding Ltd លក់ក្រុមហ៊ុនធផ្សព្វផ្សាយមួយចំនួន រួមទាំងកាសែត South China Morning Post ដោយសារតែមានការព្រួយបារម្ភកាន់តែខ្លាំងឡើង អំពីឥទ្ធិពលរបស់ក្រុមហ៊ុនបច្ចេកវិទ្យាយក្សមួយនេះ លើមតិសាធារណៈនៅក្នុងប្រទេសចិន។
ទីក្រុងប៉េកាំង បានសម្តែងការមិនពេញចិត្តអំពីការកាន់កាប់ប្រព័ន្ធផ្សព្វផ្សាយរបស់ Alibaba ក្នុងអំឡុងកិច្ចប្រជុំជាច្រើនដែលមានតាំងពីឆ្នាំ ២០២០ កន្លងទៅ។ មន្ត្រីរដ្ឋាភិបាលមានការខកចិត្តយ៉ាងខ្លាំង ជាពិសេសចំពោះឥទ្ធិពលរបស់ក្រុមហ៊ុននេះ លើបណ្តាញសង្គមនៅក្នុងប្រទេសចិន និងតួនាទីរបស់វានៅក្នុងរឿងអាស្រូវតាមអ៊ិនធឺណិត ដែលពាក់ព័ន្ធនឹងនាយកប្រតិបត្តិម្នាក់របស់ខ្លួន។
លោក Jack Ma និង Alibaba បានបង្កើតផលប័ត្រដ៏ធំទូលាយមួយនៃប្រព័ន្ធផ្សព្វផ្សាយ អស់រយៈពេលជាច្រើនឆ្នាំមកហើយ ដោយលាតសន្ធឹងលើប្រព័ន្ធផ្សព្វផ្សាយតាមអ៊ិនធឺរណែត, កាសែត, ទូរទស្សន៍, ប្រព័ន្ធផ្សព្វផ្សាយសង្គម និងក្រុមហ៊ុនផ្សាយពាណិជ្ជកម្ម ផ្សេងទៀត។
មិនតែប៉ុណ្ណោះ ក្រុមហ៊ុន Alibaba ក៏មានភាគហ៊ុនធំនៅក្នុងបណ្តាញសង្គម ដូចជា Weibo និង Youku ដែលជាសេវាកម្មផ្សព្វផ្សាយដ៏ធំបំផុតមួយរបស់ប្រទេសចិន ក៏ដូចជាបណ្តាញផ្សាយព័ត៌មានតាមអ៊ិនធឺណិត និងព្រីនផ្សេងៗទៀត រួមមានទាំង South China Morning Post ដែលជាកាសែតភាសាអង់គ្លេសឈានមុខគេនៅហុងកុង ផងដែរ៕