ក្រុមហ៊ុន Alibaba បានប្រកាសបញ្ចេញនូវគំរូ AI ថ្មីមួយជាប្រភេទ open-source version ឈ្មោះថា Wan 2.1 ដែលជាម៉ូដែល AI សម្រាប់បង្កើតវីដេអូ និងរូបភាព។ ក្នុងនោះ កាលដែលដាក់ឲប្រើប្រាស់នូវ AI នេះដោយឥតគិតថ្លៃគឺមានគោលបំណងក្នុងការប្រកួតប្រជែងនឹងក្រុមហ៊ុន AI ដទៃទៀតនៅក្នុងប្រទេសចិន និងលើពិភពលោកជាពិសេស ChatGPT, Deepseek R1 និង Grok ។
គួរគូសបញ្ចាក់ថា នៅដើមឆ្នាំ ២០២៤ ក្រុមហ៊ុននេះបានណែនាំគំរូនេះរួចមកហើយមានឈ្មោះថា Wanx មុននឹងផ្លាស់ប្តូរឈ្មោះវាជា Wan។ ម៉ូដែលថ្មីនេះ មានសមត្ថភាពបង្កើតរូបភាពដែលមានគុណភាពខ្ពស់ និងបានបង្ហាញលទ្ធផលបានយ៉ាងល្អលើវេទិកា VBench ដែលជាកម្មវិធីវាយតម្លៃសម្រាប់ AI ផលិតវីដេអូ។
ជាមួយគ្នានេះផងដែរ ក្រុមហ៊ុន Alibaba ក៏កំពុងអភិវឌ្ឍ និងសាកល្បងគំរូ AI QwQ-Max ដែលជាគំរូ AI ថ្មីរបស់ខ្លួនផងដែរ និងមានផែនការបញ្ចេញវាជាប្រភពបើកចំហនៅពេលអនាគត។ ខណៈពេលថ្មីៗនេះ ក្រុមហ៊ុនមួយនេះបានប្រកាសវិនិយោគប្រមាណ 380 ពាន់លានយន់ ឫ 52 ពាន់លានដុល្លារ ក្នុងវិស័យ AI និង cloud computing ក្នុងរយៈពេល ៣ ឆ្នាំខាងមុខ។
ជាក់ស្តែង Alibaba បាន និងកំពុងបំពេញតួនាទីយ៉ាងសំខាន់ក្នុងវិស័យ AI ដោយប្រកួតប្រជែងនឹងក្រុមហ៊ុនធំៗដូចជា OpenAI, Google និងក្រុមហ៊ុនចិនដទៃដែលកំពុងអភិវឌ្ឍម៉ូដែល AI ជាប្រភេទប្រភពបើកចំហកម្រិតខ្ពស់ ឫ open-source ៕