ក្រុមហ៊ុន Bybit ដែលជាវេទិកាផ្លាស់ប្តូរ Crypto ដ៏ធំមួយរបស់ពិភពលោកបាននឹងកំពុងប្រឈមមុខនឹងវិបត្តិសេដ្ឋកិច្ចយ៉ាងធ្ងន់ធ្ងរ បន្ទាប់ពីមានការដកប្រាក់ចេញច្រើនក្នុងរយៈពេលតែពីរថ្ងៃប៉ុណ្ណោះ។ ចំពោះបញ្ហានេះបានកើតឡើងនៅក្នុងថ្ងៃទី 21 ខែកុម្ភៈ បន្ទាប់ពីមានការវៃប្រហារពីសំណាក់ជនមិនស្គាល់មុខ ដែលគេបានអះអាងថាជាក្រុម Hacker របស់ប្រទេសខាងជើង។ ក្នុងនោះ ការវៃប្រហារនេះបានធ្វើឲក្រុមហ៊ុន Bybit បានបាត់បង់ប្រាក់ប្រមាណ 1.4 ពាន់លានដុល្លារ។
ខណៈបន្ទាប់ពីព័ត៌មាននេះផុសចេញ បានធ្វើអ្នកប្រើប្រាស់ជាច្រើននៅទូទាំងពិភពលោកបានប្រញាប់ប្រញាល់ដកប្រាក់របស់ពួកគេចេញពី Bybit ដោយនៅក្នុងថ្ងៃទី 22 ខែកុម្ភៈ មានការដកប្រាក់សរុបដល់ $2.5 ពាន់លានដុល្លារ ហើយនៅក្នុងថ្ងៃទី 23 ខែកុម្ភៈ ទៀតសោកមានការដក់ប្រាក់កាន់តែច្រើនឡើងដល់ទៅ 3.26 ពាន់លានដុល្លារ ។
ជារួម ក្នុងរយៈពេល 48 ម៉ោង ក្រុមហ៊ុន Bybit បានបាត់បង់ទ្រព្យសកម្មសរុបដល់ទៅ 5.7 ពាន់លានដុល្លារ និងធ្វើឲទ្រព្យសកម្មសរុបរបស់ក្រុមហ៊ុនបានធ្លាក់ចុះយ៉ាងខ្លាំងពី 16.9 ពាន់លានដុល្លារ ទៅ 10.8 ពាន់លានដុល្លារ។
ចំពោះរូបិយប័ណ្ណដែលមានការដកចេញច្រើនបំផុតគឺជាប្រភេទ USDT ដែលមានចំនួន 2.3 ពាន់លានដុល្លារ និង Bitcoin មានចំនួន 1.5 ពាន់លានដុល្លារ។ ខណៈអ្នកវិភាគមួយចំនួនបានសន្មត់ថា Bybit ប្រហែលជាប្រើប្រាស់ Bitcoin ទាំងនេះដើម្បីគ្របដណ្តប់ការដកប្រាក់ ឬប្រើជាវត្ថុបញ្ចាំសម្រាប់ប្រតិបត្តិការរបស់ខ្លួន។
ទោះបីមានការដកប្រាក់ច្រើនក៏ដោយ ក្រុមហ៊ុន Bybit ផ្ទាល់នៅតែអាចដំណើរការការដកប្រាក់បានដោយគ្មានការរំខាន ប៉ុន្តែវិបត្តិនេះបានបង្កការព្រួយបារម្ភយ៉ាងខ្លាំងអំពីផ្នែកសុវត្ថិភាព និងលំហូរចេញនៃទ្រព្យសកម្មនៅក្នុងវិស័យ Crypto ។ ខណៈសំណួរដែលកំពុងតែមានការជជែកនាពេលបច្ចុប្បន្ននេះសួរថា តើអតិថិជនអាចជឿជាក់លើវេទិកា Crypto បានទៀតឬទេ? ហើយវិបត្តិនេះអាចបង្កឲ្យកើតមានការដួលរលំក្នុងទីផ្សារ Crypto ឬអត់?