បន្ទាប់ពីការចរចាជាយូរមក ក្រុមហ៊ុន Apple និងរដ្ឋាភិបាលឥណ្ឌូនេស៊ី បានឈានដល់កិច្ចព្រមព្រៀងថ្មី ដែលនឹងអនុញ្ញាតឲ្យ Apple មានសិទ្ធិលក់ iPhone 16 Series នៅក្នុងប្រទេសវិញ។ កិច្ចព្រមព្រៀងនេះ ត្រូវបានរំពឹងថានឹងចុះហត្ថលេខាជាផ្លូវការក្នុងពេលឆាប់ៗនេះ បន្ទាប់ពីអាជ្ញាធរឥណ្ឌូនេស៊ីបានហាមឃាត់ការលក់ iPhone 16 តាំងពីខែតុលា ឆ្នាំ 2024 មក។
ចំពោះមូលហេតុនៃការហាមឃាត់ការលក់ iPhone 16 នៅក្នុងប្រទេសឥណ្ឌូនេស៊ីត្រូវបានអះអាងថាកើតឡើងដោយសារក្រុមហ៊ុន Apple មិនបានបំពេញតាមច្បាប់វិនិយោគរបស់អាជ្ញាធរឥណ្ឌូនេស៊ី។
ក្នុងនោះ ដើម្បីដោះស្រាយបញ្ហានេះ Apple បានប្រកាសវិនិយោគ 100 លានដុល្លារនៅក្នុងប្រទេស ប៉ុន្តែបន្ទាប់មកបានបង្កើនទៅដល់ 1 ពាន់លានដុល្លារ។ ទោះជាយ៉ាងណា នៅក្នុងខែមករា ឆ្នាំ 2024 រដ្ឋាភិបាលឥណ្ឌូនេស៊ីបានបញ្ជាក់ថា ការវិនិយោគមិនគ្រប់គ្រាន់ទេ លុះត្រាតែ Apple ចាប់ផ្តើមផលិតគ្រឿងបន្លាស់ iPhone នៅក្នុងប្រទេសរបស់ពួកគេ។
ជាផ្នែកមួយនៃកិច្ចព្រមព្រៀងថ្មី Apple នឹងវិនិយោគ 1 ពាន់លានដុល្លារ ក្នុងការបង្កើតរោងចក្រផលិត AirTags នៅក្នុងឥណ្ឌូនេស៊ី។ រោងចក្រនេះនឹងផលិតប្រហែល 20% នៃ AirTag ទូទាំងពិភពលោក។ លើសពីនេះ Apple ក៏នឹងបង្កើតរោងចក្រផលិតគ្រឿងបន្លាស់ iPhone ផ្សេងៗទៀត ដើម្បីបំពេញតាមតម្រូវការរបស់អាជ្ញាធរឥណ្ឌូនេស៊ី។ ក្រុមហ៊ុននេះក៏បានសន្យាចូលរួមក្នុងការបណ្ដុះបណ្ដាលទេពកោសល្យក្នុងស្រុក ដោយផ្តោតលើការអភិវឌ្ឍសហគ្រិនភាព និងជំនាញបច្ចេកវិទ្យា។
គួរគូសបញ្ជាក់ថា ឥណ្ឌូនេស៊ីគឺជាប្រទេសដែលមានឥទ្ធិពលខ្លាំងបំផុតនៅក្នុងតំបន់អាស៊ីអាគ្នេយ៍ និងទាក់ទាញការវិនិយោគពីក្រុមហ៊ុនបច្ចេកវិទ្យាធំៗជាច្រើន ដោយបច្ចុប្បន្ននេះប្រជាជនឥណ្ឌូនេស៊ីមានចំនួនជាង 278 លាននាក់ ធ្វើឲ្យប្រទេសមួយនេះក្លាយជាទីផ្សារដ៏សំខាន់សម្រាប់ Apple នៅក្នុងតំបន់អាស៊ីអាគ្នេយ៍៕