យោងតាមសារព័ត៌មាន ETNews បាននិយាយថា iPhone ដែលអាចបត់បានរបស់ Apple នឹងមានអេក្រង់ខាងក្រៅទំហំ 5.49 អ៊ីញ និងអេក្រង់ខាងក្នុងត្រឹមតែ 7.74 អ៊ីញ ប៉ុណ្ណោះនៅពេលបើកចេញ ដែលទំហំនេះអាចខុសប្លែកពីទូរស័ព្ទបត់ផ្សេងៗ ហើយអាចផ្តល់បទពិសោធន៍ថ្មីសម្រាប់អ្នកប្រើប្រាស់ ខណៈការផលិតទ្រង់ទ្រាយធំនឹងចាប់ផ្តើមនៅពាក់កណ្តាលឆ្នាំ 2025 នេះ ហើយអាចនឹងចេញលក់នៅក្នុងឆ្នាំ 2026។
គួរបញ្ជាក់ថា បច្ចុប្បន្ននេះ ក្រុមហ៊ុន Apple កំពុងជ្រើសរើសក្រុមហ៊ុនផ្គត់ផ្គង់គ្រឿងបន្លាស់ ដែលរំពឹងថានឹងបញ្ចប់ដំណើរការនេះនៅខែមេសា ឆ្នាំ 2025 ខាងមុខនេះ។ ទន្ទឹមនឹងនេះ ក្រុមហ៊ុន Apple ផ្ទាល់ក៏បានចាប់ដៃគូជាមួយក្រុមហ៊ុន Samsung Display ផងដែរ ដើម្បីផ្គត់ផ្គង់អេក្រង់ OLED សម្រាប់ iPhone បត់បានរួចជាផ្លូវការហើយ ដែលក្រុមហ៊ុននឹងប្រើកញ្ចក់ស្តើងបំផុត (UTG) ដែលផលិតដោយ Corning ដើម្បីបង្កើនភាពធន់។ លើសពីនេះ Apple ក៏បានសហការជាមួយ Amphenol ដែលជាក្រុមហ៊ុនផលិត hinge សម្រាប់ MacBook Pro ផងដែរ ដើម្បីបង្កើតប្រព័ន្ធបត់ដែលមានគុណភាពខ្ពស់ និងប្រើប្រាស់បានយូរ។
ខណៈការអភិវឌ្ឍ iPhone ដែលអាចបត់បានរបស់់ Apple នឹងផ្តោតលើការលុបបំបាត់បញ្ហាស្នាមបត់អេក្រង់ ដែលជាបញ្ហាធំរបស់ស្មាតហ្វូនបត់បានបច្ចុប្បន្ន និងចូលរួមប្រកួតប្រជែងជាមួយនឹងក្រុមហុន Samsung, HUAWEI និង OPPO ៕