ក្រុមហ៊ុនអេឡិចត្រូនិចវៀតណាម Mobile World ចង់ក្តោបចំណែកទីផ្សារឲ្យបាន ៦០ ភាគរយ

ក្រុមហ៊ុនលក់រាយអេឡិចត្រូនិកឈានមុខគេរបស់វៀតណាម Mobile World កំពុងសំឡឹងមើលការកើនឡើង ១៦ ភាគរយ ដើម្បីទទួលបានចំណែកទីផ្សារសរុប ៦០ ភាគរយ នៅត្រឹមឆ្នាំ ២០២២ ខាងមុខនេះ។

ពាណិជ្ជកម្ម

ក្រុមហ៊ុនខាងលើក៏ចង់បង្កើនចំណែកទីផ្សារស្មាតហ្វូនរបស់ខ្លួនពី ៤៨ ភាគរយកាលពីឆ្នាំមុន ដល់ ៥៥ ភាគរយនៅឆ្នាំ ២០២២ ដែរ។ នេះបើយោងតាមរបាយការណ៍ថ្មី ដែលបានបង្ហាញដោយក្រុមហ៊ុន SSI Securities Corporation បន្ទាប់ពីអ្នកវិភាគរបស់ខ្លួនបានជួបជាមួយតំណាងក្រុមហ៊ុន Mobile World។

គួរឲ្យដឹងថា ក្រុមហ៊ុន Mobile World គ្រោងនឹងសម្រេចគោលដៅទាំងនេះ ដោយបើកសាខាថ្មី (ប្រភេទ Dien May Xanh Supermini) ចំនួន ៦០០ កន្លែងនៅឆ្នាំ ២០២១ នេះ ក្នុងគោលបំណងដើម្បីឈានទៅដល់អ្នកទិញនៅតំបន់ជនបទ។

គិតចាប់តាំងពីការបើកដំណើរការសាខាប្រភេទថ្មី កាលពីខែកក្កដាឆ្នាំមុនរួច ក្រុមហ៊ុនខាងលើបានបង្កើតបណ្តាញសាខាជាង ៣០០ កន្លែងរួចមកហើយ។ កន្លែងលក់ទាំងនេះមានទំហំតូច ក្រោម ១៥០ ម៉ែត្រការ៉េ ហើយអាចដំណើរការបានដោយបុគ្គលិក ៤ នាក់។ វាមានលក់ស្មាតហ្វូន និងគ្រឿងអេឡិចត្រូនិចសម្រាប់ប្រើប្រាស់ក្នុងផ្ទះ៕