នៅក្នុងព្រឹត្តិការណ៍ MWC ក្រុមហ៊ុន Infinix ដែលជាក្រុមហ៊ុនផលិតទូរស័ព្ទដ៏ល្បីល្បាញមួយនៅប្រទេសចិនបានដាក់បង្ហាញបច្ចេកវិទ្យាថ្មីមួយឈ្មោះថា SolarEnergy-Reserving ដែលបច្ចេកវិទ្យានេះអាចអោយទូរស័ព្ទសាកថ្មដោយប្រើប្រាស់តែថាមពលពន្លឺព្រះអាទិត្យប៉ុណ្ណោះ គឺមិនចាំត្រូវសាកតាមថាមពលអគ្គិសនីដូចមុននោះឡើយ។
ក្នុងនោះ ទូរស័ព្ទដែលនឹងបំពាក់ជាមួយបច្ចេកវិទ្យាសាកនេះ នឹងមានរចនាជាមួយបន្ទះស្រូបថាមពលពន្លឺព្រះអាទិត្យ ឫក៏បន្ទះ Solar នៅផ្នែកខាងក្រោយ។ ជាមួយគ្នានេះ ដើម្បីជាជម្រើសបន្ថែម ក្រុមហ៊ុនក៏បានបង្កើតស្រោមទូរស័ព្ទដែលមានបន្ទះស្រូបថាមពលដូចគ្នាផងដែរ។
លើសពីនេះទៅទៀត ក្រុមហ៊ុន Infinix ផ្ទាល់ក៏បានបង្ហាញចក្ខុវិស័យសម្រាប់នាពេលអនាគតផងដែរដោយនិយាយថា ទូរស័ព្ទនាពេលអនាគតនឹងមិនត្រូវការសាកថ្មនោះទេ ព្រោះវានឹងប្រើប្រាស់នូវបច្ចេកវិទ្យាសាកថ្មដោយខ្លួនឯង តួយ៉ាងដូចជាបច្ចេកវិទ្យាសាកថ្មដោយពន្លឺព្រះអាទិត្យនេះអញ្ជឹង។ ទន្ទឹមនឹងនេះទៀត ពួកគេក៏បាននិយាយបន្ថែមដែលថា ទូរស័ព្ទរបស់ពួកគេនឹងប្រើប្រាស់នូវបណ្តាញសេវាកម្មផ្កាយរណបដោយស្វ័យប្រវត្តិទាំងស្រុងនៅពេលខាងមុខ ដើម្បីឲ្យអ្នកប្រើប្រាស់អាចទំនាក់ទំនងគ្នាបានគ្រប់ទីកន្លែង ដោយមិនចាំបាច់ប្រើប្រាស់នូវ Wi-Fi ឬបណ្តាញសេវាអ៊ីនធឺណិតដូចមុននោះឡើយ។
គួរបញ្ជាក់ផងថា ក្រៅពីបច្ចេកវិទ្យាសាកថាមពល ក្រុមហ៊ុន Infinix ផ្ទាល់ក៏បានបង្ហាញចេញនូវគំរូទូរស័ព្ទបត់ ៣ តង់ Infinix Zero Mini tri-fold និងគំរូទូរស័ព្ទ E Ink ជំនាន់ទី ២ ផងដែរ ដែលគំរូទូរស័ព្ទ E Ink ជំនាន់ទី ២ នេះ គឺអាចផ្លាស់ប្តូរពណ៌បានដោយប្រើប្រាស់នូវថាមពលថ្មខាងក្នុងតែម្តង គឺមិនត្រូវការការដោតសាកចូលដូចជំនាន់មុននោះទេ៕