បណ្តាញអ៊ីនធឺណិតតាមផ្កាយរណប Starlink របស់លោក Elon Musk ត្រូវបានគេរាយការណ៏ថា កំពុងជួបនឹងការប្រកួតប្រជែងជាខ្លាំងនៅក្នុងពេលថ្មីៗនេះ ជាពិសេសពីសំណាក់ក្រុមហ៊ុន SpaceSail របស់ចិន និង Project Kuiper របស់ Amazon ។
ក្នុងនោះ ក្រុមហ៊ុន SpaceSail គឺជាក្រុមហ៊ុនថ្មីមួយដែលមានមូលដ្ឋាននៅក្នុងទីក្រុងសៀងហៃ ដែលកំពុងទទួលបានការគាំទ្រជាខ្លាំងពីសំណាក់រដ្ឋាភិបាលរបស់ប្រទេសចិន ដែលកំពុងរៀបចំគម្រោងពង្រីកសេវាកម្មទៅកាន់បណ្តាប្រទេសជាច្រើនដូចជា ប្រេស៊ីល និងកាហ្សាក់ស្ថាន។
ក្នុងខែវិច្ឆិកាកន្លងទៅ SpaceSail បានចូលទីផ្សារអ៊ីនធឺណិតផ្កាយរណបនៅក្នុងប្រទេសប្រេស៊ីល ហើយនៅខែមករាថ្មីៗនេះ ពួកគេក៏បានចាប់ផ្តើមប្រតិបត្តិការនៅក្នុងប្រទេសកាហ្សាក់ស្ថានផងដែរ។ ទន្ទឹមនឹងនេះ ក្រុមហ៊ុន Project Kuiper របស់ Amazon និង Telesat របស់កាណាដាក៏កំពុងពិភាក្សាជាមួយប្រេស៊ីល ដើម្បីផ្តល់ជម្រើសថ្មីសម្រាប់បណ្តាញអ៊ីនធឺណិតល្បឿនលឿនទៅកាន់តំបន់ដាច់ស្រយាលផងដែរ។
គួរឲដឹងថា បច្ចុប្បន្ននេះ ក្រុមហ៊ុន Starlink របស់លោក Elon Musk មានផ្កាយរណប (LEO) ប្រមាណ 7,000 គ្រឿងនៅលើគន្លងផែនដី ហើយគ្រោងនឹងបង្កើនដល់ 42,000 គ្រឿង នៅចុងទសវត្សរ៍នេះ។ ខណៈក្រុមហ៊ុន SpaceSail វិញគ្រោងនឹងបាញ់បង្ហោះផ្កាយរណប LEO ចំនួន 648 គ្រឿង នៅក្នុងឆ្នាំ ២០២៥ នេះ និងដាក់ពង្រាយរហូតដល់ 15,000 គ្រឿង នៅមុនឆ្នាំ 2030 ។
គួរគូសបញ្ជាក់ថា ការដាក់គោលដៅនេះ បានបង្ហាញយ៉ាងច្បាស់ថា SpaceSail ចង់ប្រកួតប្រជែងជាមួយនឹង Starlink និងក្លាយជាគូរប្រកួតប្រជែងដ៏មានឥទ្ធិពលនៅក្នុងវិស័យនេះ ដោយចង់គ្រប់គ្រងក្នុងវិស័យអាវកាស និងបច្ចេកវិទ្យាឌីជីថល ប៉ុន្តែបញ្ហានេះបានធ្វើឲរដ្ឋាភិបាលលោកខាងលិចជាច្រើនបានបង្ហាញពីការព្រួយបារម្ភលើបញ្ហានេះ និងកំពុងពង្រឹងក្នុងការឃ្លាំមើល និងត្រួតពិនិត្យព័ត៌មានលើបណ្តាញអន្តរជាតិ៕