កាលពីពេលថ្មីៗនេះ ក្រុមហ៊ុន Apple បានប្រកាសអំពីការវិនិយោគដ៏ធំបំផុតរបស់ពួកគេដែលមានចំនួនដល់ទៅ 500 ពាន់លានដុល្លារ ក្នុងរយៈពេល 4 ឆ្នាំខាងមុខ នៅក្នុងសហរដ្ឋអាមេរិក។ ការវិនិយោគនេះ នឹងផ្តោតលើការច្នៃប្រឌិត, ផលិតកម្មក្នុងស្រុក, បញ្ញាសិប្បនិម្មិត (AI), វិស្វកម្មស៊ីលីកុន និងការអភិវឌ្ឍកម្លាំងពលកម្ម។
ក្នុងនោះ ក្រុមហ៊ុន Apple បានអះអាងថា ក្នុង 5 ឆ្នាំចុងក្រោយ ពួកគេបានបង់ពន្ធសរុបដល់ 75 ពាន់លានដុល្លារ និងបានបង្កើត ការងារជាង 2.9 លានកន្លែង នៅសហរដ្ឋអាមេរិក។
ជាផ្នែកមួយនៃការវិនិយោគនេះ Apple នឹងបើករោងចក្រផលិតថ្មីនៅក្នុងទីក្រុង Houston ដែលមានទំហំ 250,000 ហ្វីតការ៉េ។ ចំពោះរោងចក្រនេះ នឹងផ្តោតលើម៉ាស៊ីនមេសម្រាប់ប្រព័ន្ធ AI ដែលនឹងជួយបង្កើតការងាររាប់ពាន់កន្លែង និងពង្រីកសមត្ថភាពផលិតកម្មក្នុងស្រុក។ ជាមួយគ្នានេះ ក្រុមហ៊ុនក៏បានអះអាងផងដែរថា ម៉ាស៊ីនមេទាំងនេះនឹងត្រូវបានរចនាឡើងសម្រាប់បង្កើនប្រសិទ្ធភាពក្នុងផ្ទុកថាមពលកម្រិតខ្ពស់ ដើម្បីកាត់បន្ថយការប្រើប្រាស់ថាមពលរបស់មជ្ឈមណ្ឌលទិន្នន័យ។
លើសពីនេះ Apple ក៏បានប្តេជ្ញាចិត្តបង្កើនមូលនិធិផលិតកម្មកម្រិតខ្ពស់ទ្វេដងផងដែរ ដែលបានបង្កើតឡើងក្នុងឆ្នាំ 2017 ពី 5 ពាន់លានដុល្លារ ទៅ 10 ពាន់លានដុល្លារ។ ខណៈការវិនិយោគនេះ នឹងជួយជំរុញការផលិតបន្ទះឈីប និងបន្តភាពជាដៃគូជាមួយ TSMC នៅក្នុងរដ្ឋ Arizona ដែលជាកន្លែងផលិតបន្ទះឈីបរបស់ Apple។ នេះក៏រួមមានការរួមការងារជាមួយក្រុមហ៊ុន Broadcom, Texas Instruments, Skyworks និង Qorvo ផងដែរ ដើម្បីពង្រីកឧស្សាហកម្មស៊ីលីកុន នៅក្នុងរដ្ឋចំនួន 12 រដ្ឋ ក្នុងសហរដ្ឋអាមេរិក។
ទន្ទឹមនឹងនេះ Apple ក៏បានប្រកាសអំពីការវិនិយោគបន្ថែមលើការស្រាវជ្រាវ និងអភិវឌ្ឍន៍ (R&D) ទៀតផង ដោយពួកគេគ្រោងបង្កើនចំណាយលើ R&D ជិតពីរដងក្នុង 5 ឆ្នាំចុងក្រោយ។ សម្រាប់ការវិនិយោគបន្ថែមលើការស្រាវជ្រាវ និងអភិវឌ្ឍន៍ (R&D) នេះក្រុមហ៊ុនផ្ទាល់ក៏មានគម្រោងជួលបុគ្គលិកថ្មីប្រមាណ 20,000 នាក់ ក្នុង 4 ឆ្នាំខាងមុខផងដែរ ដោយផ្តោតលើវិស្វកម្មស៊ីលីកុន, AI និង Machine Learning។ ជាការរួមចំណែកក្នុងការអប់រំ និងអភិវឌ្ឍន៍កម្លាំងពលកម្ម, Apple ក៏បានបង្កើត Apple Manufacturing Academy នៅក្នុងទីក្រុង Detroit ដើម្បីជួយសហគ្រាសធុនតូច និងមធ្យមក្នុងការអភិវឌ្ឍផលិតកម្មកម្រិតខ្ពស់ និងបច្ចេកវិទ្យា AI ។
លើសពីនេះ ក្រុមហ៊ុនក៏បានពង្រីក New Silicon Initiative ដែលជាកម្មវិធីបណ្តុះបណ្តាលសិស្សសម្រាប់វិស្វកម្មស៊ីលីកុន និងការរចនាមីក្រូឈីប ដោយក្រុមហ៊ុនផ្ទាល់បានសហការជាមួយសាកលវិទ្យាល័យចំនួន 15 ។ ក្នុងនោះ Apple ក៏បានចូលរួមជាដៃគូជាមួយ មជ្ឈមណ្ឌល UCLA CEMiD ដើម្បីបណ្តុះបណ្តាលអ្នករចនាមីក្រូឈីប (Semiconductor Designers) នាពេលអនាគតផងដែរ។
ជារួម ការវិនិយោគរបស់ Apple នេះនឹងជួយបង្កើតការងារ, ជំរុញឧស្សាហកម្មបច្ចេកវិទ្យា និងពង្រីកផលិតកម្មស៊ីលីកុនក្នុងសហរដ្ឋអាមេរិក៕