ក្រុមហ៊ុន Google ត្រូវបានគេរាយការណ៍ថា កំពុងរៀបចំដាក់ឱ្យដំណើរការ YouTube Premium Lite ដែលជាជម្រើសជាវថោកជាងសេវាកម្ម YouTube Premium ។ សេវាកម្មថ្មីនេះ ត្រូវបានរាយការណ៍ថា នឹងដាក់ឱ្យដំណើរការនៅសហរដ្ឋអាមេរិក អូស្ត្រាលី អាល្លឺម៉ង់ និងប្រទេសថៃ។
បើយោងតាម Bloomberg រាយការណ៍ថា សេវាកម្មនេះនឹងផ្គត់ផ្គង់ដល់អ្នកប្រើប្រាស់ដែលចង់បានបទពិសោធន៍លើការមើលវីដេអូភាគច្រើនដែលគ្មានពាណិជ្ជកម្ម ប៉ុន្តែមិនចាំបាច់ត្រូវការការចូលប្រើ YouTube Music ឬមុខងារផ្សេងៗនោះឡើយ។ ខណៈតម្លៃជាវជាក់លាក់មិនត្រូវបានបង្ហាញនៅឡើយទេ ប៉ុន្តែការសាកល្បងមុននេះបានបង្ហាញថា តម្លៃសេវាកម្មនេះនៅប្រទេសអូស្ត្រាលីគឺ $8.99 AUD ឫ $5.85 USD ក្នុងមួយខែ សម្រាប់អ្នកប្រើប្រាស់តាមគេហទំព័រ និង $11.99 AUD ឫ $7.80 USD សម្រាប់អ្នកប្រើប្រាស់ iOS ។
គួរឲដឹងថា សេវាកម្មនេះ ត្រូវបានសាកល្បងជាលើកដំបូងនៅប្រទេសអឺរ៉ុបខ្លះក្នុងឆ្នាំ 2021 ប៉ុន្តែត្រូវបានបញ្ឈប់នៅឆ្នាំ 2023។ ប៉ុន្តែ YouTube Premium Lite អាចរួមបញ្ចូលនូវការផ្សាយពាណិជ្ជកម្មដែលមានកំណត់ ពោលគឺមានតិច តែគ្មានការផ្សាយពាណិជ្ជកម្មទាំងស្រុងនោះឡើយ។
ទន្ទឹមនឹងនេះ អ្នកនាំពាក្យរបស់ YouTube បានបញ្ជាក់ថា ក្រុមហ៊ុនកំពុងធ្វើការលើការជាវថ្មីដែលផ្តល់នូវការមើលវីដេអូភាគច្រើនដោយគ្មានពាណិជ្ជកម្ម ហើយក៏មានគម្រោងផែនការពង្រីកសេវាកម្មនេះទៅកាន់ប្រទេសផ្សេងៗទៀតផងដែរ ទោះបីជាកាលបរិច្ឆេទដាក់ឱ្យដំណើរការជាផ្លូវការមិនទាន់ត្រូវបានប្រកាសក៏ដោយ ប៉ុន្តែការផ្លាស់ប្តូរនេះអាចផ្តល់នូវជម្រើសថ្មីសម្រាប់អ្នកប្រើប្រាស់ដែលចង់បានបទពិសោធន៍មើលវីដេអូដោយមានការផ្សាយពាណិជ្ជកម្មតិចជាងមុន ដោយមិនចាំបាច់ជាវសេវាកម្ម YouTube Premium ពេញលេញ៕