ក្រុមហ៊ុន Apple ត្រូវបានគេរាយការណ៍ថា នឹងពន្យាពេលក្នុងការដាក់បង្ហាញចេញនូវមុខងារ Siri AI ថ្មីដោយសារមានបញ្ហាផ្នែកវិស្វកម្ម។ នេះយោងតាម Mark Gurman របស់ Bloomberg ។ ក្នុងនោះ ក្រុមហ៊ុន Apple គ្រោងនឹងបញ្ចូលការអាប់ដេតនេះជាមួយ iOS 18.4 ក្នុងខែមេសា ប៉ុន្តែដោយសារមានបញ្ហាផ្នែកវិស្វកម្មពួកគេនឹងត្រូវពន្យាពេលបញ្ចេញទៅខែឧសភាវិញជាមួយ iOS 18.5 ។
ជាមួយគ្នានេះ ការកែលម្អ Siri ឫក៏ការដាក់បញ្ចូលបច្ចេកវិទ្យា AI ទៅក្នុង Siri គឺជាផ្នែកមួយនៃយុទ្ធសាស្ត្រ “Apple Intelligence” ដែលមានគោលបំណងធ្វើឱ្យ Siri វាឆ្លាតវៃជាងមុន អាចឆ្លើយសំណួរ និងបំពេញតម្រូវការរបស់់អ្នកប្រើប្រាស់កាន់តែល្អប្រសើរ។ប៉ុន្តែទោះបីជាមានការអាប់ដេតថ្មីក៏ដោយ ក៏ Apple នឹងប្រកាសចេញមុខងារ Siri AI ជាដំណាក់កាលប៉ុណ្ណោះ។
គួរឲដឹងថា ការពន្យាពេលក្នុងការបញ្ចេញ Siri AI ថ្មី អាចនឹងធ្វើឱ្យ Apple ស្ថិតក្នុងស្ថានភាពលំបាកក្នុងការប្រកួតប្រជែងជាមួយ ChatGPT របស់ OpenAI, Google Gemini, និង Llama របស់ Meta។ តែទោះបីជាមានការពន្យាពេលក៏ដោយ Apple នៅតែបន្តការងាររបស់ខ្លួនក្នុងការធ្វើឱ្យ Siri កាន់តែឆ្លាតវៃ និងមានសមត្ថភាពខ្ពស់ជាងមុខ ដើម្បីបំពេញតាមតម្រូវការរបស់អ្នកប្រើប្រាស់នៅក្នុងអនាគត៕