ក្រុមហ៊ុន Apple ត្រូវបានគេរាយការណ៍ថា កំពុងចាប់ដៃគូជាមួយ Alibaba ដើម្បីបញ្ចូលមុខងារ AI នៅលើ iPhone សម្រាប់អ្នកប្រើប្រាស់នៅក្នុងប្រទេសចិនរបស់ពួកគេ។ ការផ្លាស់ប្តូរនេះ មានគោលបំណងដោះស្រាយបញ្ហាការលក់ iPhone នៅតំបន់នេះដែលបានធ្លាក់ចុះ និងបន្តការប្រកួតប្រជែងជាមួយក្រុមហ៊ុន Huawei ។
ដើមឡើយ ក្រុមហ៊ុន Apple បានជ្រើសរើស Baidu ជាដៃគូ AI ក្នុងឆ្នាំមុន ប៉ុន្តែបន្ទាប់មក Apple ក៏ត្រូវបានគេរាយការណ៍ថាបានប្ដូរជម្រើសទៅ Alibaba វិញ ដោយសារមិនអាចសម្រេចបាននូវការទំនាក់ទំនងល្អជាមួយ Baidu និងមិនមានផ្តល់នូវតម្រូវការដែល Apple ចង់បាន។
ចំពោះហេតុផលមួយក្នុងចំណោមការសម្រេចចិត្តនេះ ព្រោះក្រុមហ៊ុន Alibaba មានទិន្នន័យធំបំផុតអំពីការទិញទំនិញ និងការទូទាត់របស់អ្នកប្រើប្រាស់នៅក្នុងប្រទេសចិន។ ព័ត៌មាននេះអាចជួយ Apple បង្កើតម៉ូដែល AI ដែលមានភាពច្បាស់លាស់ល្អជាងមុន និងអាចផ្តល់សេវាកម្មផ្ទាល់ខ្លួនបានល្អប្រសើរជាងមុនសម្រាប់អ្នកប្រើប្រាស់៕