ការនាំចូលរបស់ប្រទេសចិន បានកើនឡើងក្នុងល្បឿនលឿនបំផុតមួយក្នុងខែកញ្ញានេះ ខណៈពេលដែលការនាំចេញបានបន្តកើនឡើង ស្របពេលសេដ្ឋកិច្ចរបស់ប្រទេសចិន កំពុងស្ទុះងើបឡើងវិញ ហើយក៏មានភាពប្រសើរឡើងវិញដែរ ចំពោះការប្រើប្រាស់ទំនិញក្នុងស្រុក។
ទិន្នន័យផ្លូវការកាលពីថ្ងៃអង្គារបានបង្ហាញថា ការនាំចូលបានកើនឡើង ១៣,២% (year-on-year) នៅក្នុងខែកញ្ញានេះ ដែលលើសពីការរំពឹងទុករបស់ទីផ្សារ ថាកើនឡើងតែ ០,៣% ប៉ុណ្ណោះ។ នេះក៏ជាការកើនឡើងដំបូងនៃការនាំចូលក្នុងរយៈពេល ៣ខែចុងក្រោយដែរ ដោយសារតែសកម្មភាពក្នុងស្រុកបានងើបឡើងវិញ។
ការនាំចេញពីប្រទេសចិន ក៏មានការកើនឡើងយ៉ាងខ្លាំងផងដែរ ពោលគឺកើនឡើង ៩,៩% (year-on-year) ធ្វើឲ្យវាក្លាយជាការកើនឡើងនៃការលក់នៅក្រៅប្រទេស រយៈពេល៤ខែជាប់ៗគ្នា ភាគច្រើនមកពីតម្រូវការសម្រាប់ផ្គត់ផ្គង់សម្ភារៈពេទ្យ និងគ្រឿងអេឡិចត្រូនិច។
គួររំលឹកឲ្យដឹងថា ចិន គឺជាប្រទេសដំបូងបង្អស់ ដែលបានរងគ្រោះដោយសារជំងឺកូវីដ១៩ ដែលបានផ្ទុះឡើងនៅក្នុងខេត្តវូហាន៕