វាមានរយៈពេលច្រើនឆ្នាំមកហើយដែរ ដែលលោក Elon Musk ជួបប្រទះនូវបញ្ហាផលិតកម្មរថយន្តអគ្គិសនី នៅរោងចក្រ Tesla។ ចាប់តាំងពីពេលនោះមក អ្វីៗគ្រប់យ៉ាងហាក់មានភាពប្រសើរឡើងវិញខ្លាំង រហូតដល់មានអ្នកជំនាញម្នាក់ហ៊ានអះអាងថា ឥឡូវនេះ Tesla ដើរមុនគូប្រជែងដល់ទៅ ១០ឆ្នាំឯណោះ។
ជាមួយគ្នានេះដែរ វិនិយោគិន និងអ្នកវិភាគ បានកត់សម្គាល់ឃើញច្បាស់ពីការផ្លាស់ប្តូររបស់ Tesla។ នេះបើតាមសម្តីលោក Sandy Munro ដែលល្បីខាងធ្វើវិភាគលើរថយន្ត។ លោកបន្ថែមថា តម្លៃភាគហ៊ុនរបស់ក្រុមហ៊ុន Tesla បានកើនឡើងយ៉ាងខ្លាំង រយៈពេល ៤ត្រីមាសជាប់ៗគ្នា ជាលើកដំបូងបង្អស់សម្រាប់ Tesla។
គួរឲ្យដឹងថា បច្ចុប្បន្ននេះ Tesla មានរោងចក្រផលិតរថយន្ត ដែលដំណើរការដោយប្រើគ្រឿងយន្តសឹងទាំងស្រុង។ Tesla ធ្លាប់អះអាងកាលពីដើមឆ្នាំ២០២០ថា ខ្លួនរំពឹងថាអាចផលិតរថយន្តអគ្គិសនីបានយ៉ាងហោចណាស់ ៥០០ ០០០គ្រឿងក្នុងឆ្នាំនេះ។ ប៉ុន្តែឥឡូវនេះ Tesla អាចផលិតរថយន្តអគ្គិសនីលើស ៥០០ ០០០គ្រឿង បានយ៉ាងងាយស្រួលតែម្តងសម្រាប់ឆ្នាំ២០២០៕