កាលពីពេលថ្មីៗនេះ មហាសេដ្ឋី Elon Musk និងក្រុមវិនិយោគិនមួយរបស់លោកបានប្រកាសស្នើសុំទិញក្រុមហ៊ុន OpenAI ដែលជាក្រុមហ៊ុនមេធំរបស់ Chatgpt ក្នុងតម្លៃប្រមាណ 97.4 ពាន់លានដុល្លារ នេះបើយោងតាមកាសែត The Wall Street Journal ។
ទោះយ៉ាងណាក៏ដោយ លោក Sam Altman នាយកប្រតិបត្តិរបស់ OpenAI បានបដិសេធសំណើនេះភ្លាមៗនៅលើ X ឫ Twitter របស់លោកដោយបានចំអកថា “ទេអរគុណ ប៉ុន្តែយើងនឹងទិញ Twitter របស់អ្នកក្នុងតម្លៃ 9.74 ពាន់លានដុល្លារវិញ ប្រសិនបើអ្នកចង់បាន”។ គួរបញ្ជាក់ថា បច្ចុប្បន្ននេះ ក្រុមហ៊ុន OpenAI មិនទាន់ទទួលបានសំណើជាផ្លូវការពីក្រុមវិនិយោគិនមួយនេះនៅឡើយទេ។
ចំពោះការដេញថ្លៃនេះ បានកើតឡើងក្នុងបរិបទនៃជម្លោះរវាងលោក Elon Musk និង Sam Altman ដោយលោក Elon Musk ផ្ទាល់បានចោទប្រកាន់ថា OpenAI បានផ្លាស់ប្តូរពីបេសកកម្មដើមរបស់ក្រុមហ៊ុនដែលមិនរកប្រាក់ចំណេញទៅជាការផ្តោតលើប្រាក់ចំណេញ។
គួរបញ្ជាក់ថា លោក Elon Musk គឺជាស្ថាបនិកម្នាក់ក្នុងចំណោមសហស្ថាបនិកនៃ OpenAI នៅក្នុងឆ្នាំ 2015 ដែលដំបូងឡើយក្រុមហ៊ុនមួយនេះជាក្រុមហ៊ុនមិនរកប្រាក់ចំណេញ “nonprofit” និងផ្តោតលើ AI សុវត្ថិភាព។ ប៉ុន្តែនៅក្នុងឆ្នាំ 2018 គាត់បានចាកចេញពី OpenAI ដោយសារតែការខ្វែងគំនិតគ្នា និងជម្លោះផលប្រយោជន៍ដែលកើតមានជាមួយគម្រោង AI របស់ក្រុមហ៊ុន Tesla។ ក្រោយមក ក្រុមហ៊ុន OpenAI ក៏បានផ្លាស់ប្តូរទិសដៅក្រុមហ៊ុនទៅជា “capped-profit” វិញ សម្រាប់រកប្រាក់ចំណេញ ហើយក៏បានទទួលការវិនិយោគសំខាន់ៗជាច្រើនពី Microsoft (ឥឡូវនេះជាដៃគូសំខាន់) ។ ហើយចាប់ពីពេលនោះមកលោក Elon Musk ផ្ទាល់បានចាប់ផ្តើមរិះគន់ OpenAI ជាបន្ទាប់បន្តអំពីការកែប្រែមួយនេះ។
គួរឲដឹងថា បច្ចុប្បន្ន OpenAI មានក្រុមហ៊ុន Microsoft ជាដៃគូវិនិយោគសំខាន់ ដែលបានវិនិយោគចំនួន 13 ពាន់លានដុល្លារ ប៉ុន្តែក្រុមហ៊ុនមួយនេះ ក៏កំពុងនឹងស្វែងរកមូលនិធិដើម្បីបង្កើនតម្លៃក្រុមហ៊ុនរបស់ពួកគេផងដែរ ខណៈថ្មីៗនេះក្រុមហ៊ុន SoftBank របស់ជប៉ុន បាននឹងកំពុងផ្តល់មូលនិធិចុងក្រោយបំផុតដោយផ្តល់តម្លៃដល់ OpenAI ចំនួន 300 ពាន់លានដុល្លារ។ ខណៈ ការវិនិយោគនេះ អាចនឹងធ្វើឱ្យ OpenAI ក្លាយជាក្រុមហ៊ុនបច្ចេកវិទ្យាឯកជនដែលមានតម្លៃបំផុតលំដាប់ទី ២ បន្ទាប់ពី ByteDance ដែលជាម្ចាស់ TikTok ៕