ក្រុមហ៊ុន Apple ត្រូវបានគេរាយការណ៍ថា កំពុងរៀបចំផែនការក្នុងការដាក់បង្ហាញចេញនូវ MacBook Pro ដំបូងរបស់ខ្លួនដែលប្រើប្រាស់នូវអេក្រង់ OLED នៅក្នុងឆ្នាំ 2026 ខាងមុខនេះ នេះបើយោងតាមរបាយការណ៍ខ្សែសង្វាក់ផ្គត់ផ្គង់ថ្មីពីប្រទេសកូរ៉េខាងត្បូង។ ក្នុងនោះ បន្ទះអេក្រង់ថ្មីនេះ នឹងត្រូវផលិតដោយក្រុមហ៊ុន Samsung Display ហើយបច្ចុប្បន្នក្រុមហ៊ុនកូរ៉េមួយនេះក៏កំពុងសាកល្បងលើគំរូដំបូងផងដែរ។ ខណៈការផលិតទូទៅ នឹងចាប់ផ្តើមនៅឆ្នាំក្រោយ ហើយរំពឹងថានឹងមានការនាំចេញពី 3 ទៅ 5 លានគ្រឿងក្នុងមួយឆ្នាំ។
ជាមួយគ្នានេះ MacBook Pro ថ្មីរបស់ Apple ក៏នឹងទទួលមានការរចនាឡើងវិញទាំងស្រុងទៅលើផ្នែកមួយចំនួនផងដែរដូចជាអេក្រង់ស្តើងជាងមុន និងការរចនាកាមេរ៉ា ឫ Webcam ថ្មី ជាប្រភេទ Hole-Punch Webcam ដែលមានទំហំតូច ពោលគឺនឹងមិនមានការរចនាឆកដែលមានទំហំធំទៀតនោះទេ។ ទន្ទឹមនឹងនេះ ការប្រើបន្ទះ OLED ថ្មីក៏អាចនឹងជួយឱ្យម៉ាស៊ីនស្រាល និងស្តើងជាងម៉ូឌែលដែលដាក់លក់ក្នុងពេលបច្ចុប្បន្នផងដែរ។
ចំណែក MacBook Air ជាមួយអេក្រង់ OLED វិញ ការចេញលក់នឹងយូរជាងនេះ ពោលគឺ MacBook Air ដែលប្រើអេក្រង់ OLED នឹងមិនចេញមុនឆ្នាំ 2029 នោះឡើយ។
គួរបញ្ជាក់ថា អេក្រង់ OLED ដែលនឹងប្រើលើ MacBook Pro នឹងប្រើ layer ឫស្រទាប់ ចំនួន ២ ស្រទាប់ ដើម្បីធ្វើឱ្យពន្លឺរបស់អេក្រង់កាន់តែភ្លឺច្បាស់ និងសន្សំសំចៃថាមពលបានច្រើនជាងការប្រើ layer ចំនួន ១ ស្រទាប់ ដែលធ្វើឲការប្រើប្រាស់បានកាន់តែយូរ និងអាចប្រើបានច្រើនឆ្នាំ៕