ថ្មីៗនេះ ក្រុមហ៊ុន Meta Platforms បានប្រកាសរៀបចំផែនការវិនិយោគប្រមាណ 65 ពាន់លានដុល្លារសម្រាប់ឆ្នាំ 2025 ដោយមានគោលបំណងប្រកួតប្រជែងជាមួយ OpenAI និង Google នៅក្នុងវិស័យបញ្ញាសិប្បនិមិត្ត (AI) ។ ផែនការនេះរួមមានការពង្រឹងហេដ្ឋារចនាសម្ព័ន្ធ AI ដោយការបង្កើតមជ្ឈមណ្ឌលទិន្នន័យដ៏ធំមួយដែលមានសមត្ថភាពដល់ 2 ជីហ្គាវ៉ាត់ អាចគ្របដណ្តប់ទិន្នន័យភាគច្រើននៅក្នុងទីក្រុង Manhattan។
ជាមួយគ្នានេះ លោក Mark Zuckerberg បានបញ្ជាក់ថា Meta នឹងបង្កើនការជួលបុគ្គលិកសម្រាប់បំពេញតួនាទីក្នុងការអភិវឌ្ឈន៍ AI និងធ្វើឱ្យប្រសើរឡើងលើការដំណើរការ graphics processors ដោយអាចបំពេញសមត្ថភាពដល់ 1.3 លាន នៅចុងឆ្នាំ 2025 នេះផងដែរ។
លើសពីនេះ Meta ក៏កំពុងអភិវឌ្ឍម៉ូដែល Llama AI ដែលអាចប្រើប្រាស់បានដោយសេរីសម្រាប់អាជីវកម្ម និងអ្នកប្រើប្រាស់ទូទៅផងដែរ។ ដោយក្នុងនោះ លោក Mark Zuckerberg ផ្ទាល់បានរំពឹងថា AI នឹងមានឥទ្ធិពលយ៉ាងសំខាន់លើផលិតផល និងអាជីវកម្មរបស់ Meta ក្នុងរយៈពេលប៉ុន្មានឆ្នាំខាងមុខនេះ ដោយលោកបានរំពឹងថានឹងមានអ្នកប្រើប្រាស់សេវាកម្ម AI របស់ Meta លើសពី 1 ពាន់លាននាក់ ក្នុងឆ្នាំ២០២៥ នេះ៕
