ក្រុមហ៊ុន Tata Electronics បានទិញភាគហ៊ុន 60% នៅក្នុងរោងចក្រផលិត iPhone របស់ក្រុមហ៊ុន Pegatron នៅក្នុងប្រទេសឥណ្ឌា។ ត្រលប់ទៅខែមីនាឆ្នាំមុន ក្រុមហ៊ុន Tata Electronics ក៏បានទិញប្រតិបត្តិការរបស់ក្រុមហ៊ុន Wistron នៅក្នុងប្រទេសឥណ្ឌាផងដែរ ដូច្នេះវាច្បាស់ណាស់ថាក្រុមហ៊ុន Tata Electronics នឹងក្លាយក្រុមហ៊ុនដ៏ធំបំផុតនៅក្នុងការផលិតគ្រឿងអេឡិចត្រូនិកនៅក្នុងប្រទេសឥណ្ឌា។
ការទិញយកភាគហ៊ុនគ្រប់គ្រងនៅក្នុងក្រុមហ៊ុន Pegatron Technology India នេះត្រូវបានប្រកាសចេញដោយគណៈកម្មការប្រកួតប្រជែងនៃប្រទេសឥណ្ឌា។ បន្ទាប់ពីការទិញយកភាគហ៊ុនរបស់ក្រុមហ៊ុន Pegatron India, ក្រុមហ៊ុន Tata Electronics នឹងធ្វើការកែប្រែម៉ាកយីហោឡើងវិញ ដើម្បីឲ្យស្របតាមរចនាសម្ព័ន្ធកម្មសិទ្ធិថ្មីរបស់ពួកគេ។
គួរឲដឹងថា ក្រុមហ៊ុន Tata បានដំណើរការរោងចក្រដំឡើង iPhone រួចហើយនៅទីក្រុង Karnataka ដោយការទិញយកក្រុមហ៊ុន Wistron កាលពីឆ្នាំមុន ហើយឥឡូវនេះអាចនិយាយបានថាពួកគេនឹងក្លាយជាក្រុមហ៊ុនដ៏ធំបំផុតនៅក្នុងខ្សែសង្វាក់ផ្គត់ផ្គង់របស់ Apple ។ ក្នុងនោះ ក្រុមហ៊ុន Tata ក៏កំពុងស្ថិតក្នុងដំណើរការសាងសង់កន្លែងផលិតទូរស័ព្ទ iPhone មួយទៀតនៅទីក្រុង Hosur រដ្ឋ Tamil Nadu ផងដែរ៕